Pankaj Udhas: पंकज उधास यांच्या पत्नीची पुण्यातील कोट्यवधींची प्रॉपर्टी चर्चेत; दर महिन्याला बँक देणार तब्बल इतकं भाडं
दिवंगत गझल गायक पंकज उधास यांच्या पत्नी फरीदा पंकज उधास यांनी नुकतीच एक प्रॉपर्टी डील केली असून त्याची चर्चा होत आहे. त्यांनी पुण्यातील आपली मालमत्ता एका बँकेला भाड्याने दिली आहे.
दिवंगत प्रसिद्ध गझल गायक पंकज उधास यांच्या निधनानंतर त्यांच्या कुटुंबाशी संबंधित एक मोठी प्रॉपर्टी डील समोर आली आहे. पंकज उधास यांच्या पत्नी फरीदा पंकज उधास यांनी पुण्यातील आपली कमर्शियल प्रॉपर्टी ‘आयसीआयसीआय बँके’ला तब्बल 9 वर्षांसाठी लीजवर दिली आहे. या व्यवहाराची एकूण किंमत सुमारे 2.89 कोटी रुपये असल्याची माहिती प्रॉपर्टी रजिस्ट्रेशन कागदपत्रांच्या आधारे समोर आली आहे. ‘सीआरई मॅट्रिक्स’कडून मिळालेल्या प्रॉपर्टी रजिस्ट्रेशन डॉक्युमेंट्सनुसार, पुण्यातील हडपसर-मुंढवा रोड परिसरातील ‘फरेना कॉर्पोरेट पार्क’ इथं ही प्रॉपर्टी आहे.
नऊ वर्षांचा करार
पहिल्या मजल्यावरील तब्बल 3,347 स्क्वेअर फूट कमर्शियल स्पेस ICICI बँकेनं लीजवर घेतली आहे. या जागेसाठी बँक दर महिन्याला 2.50 लाख रुपये भाडं देणार आहे. म्हणजे सुरुवातीच्या दरानुसार वर्षाला सुमारे 30 लाख रुपयांचं भाडं होणार आहे. या प्रॉपर्टीचा लीज करार 17 सप्टेंबर 2026 रोजी रजिस्टर झाला असून त्याच दिवसापासून लीज सुरू झाली आहे. करारानुसार हा कालावधी 9 वर्षांचा आहे. विशेष म्हणजे दर तीन वर्षांनी भाड्यात 10 टक्के वाढ करण्याची तरतूद करण्यात आली आहे. त्यामुळे संपूर्ण लीज कालावधीत मिळणारे एकूण भाडे सुमारे 2.89 कोटी रुपये असल्याचे अहवालात नमूद करण्यात आलं आहे.
या व्यवहारासाठी ICICI बँकेनं 10 लाख रुपयांची सिक्युरिटी डिपॉझिट दिली आहे. शिवाय लीजवर दिलेल्या जागेसोबत पार्किंगची सुविधाही आहे. यात चार कार आणि 15 दुचाकींसाठी पार्किंग उपलब्ध असल्याची माहिती प्रॉपर्टी कागदपत्रांमध्ये आहे. करारामध्ये एकूण 105 दिवसांचा रेंट-फ्री कालावधी असून सहा महिन्यांचा लॉक-इन पीरियडदेखील आहे. विशेष म्हणजे ICICI बँकसाठी या कॉम्प्लेक्समधील ही पहिलीच जागा नाही. बँक याच ठिकाणी 2,794 स्क्वेअर फूट कमर्शियल युनिट आधीपासून लीजवर वापरत आहे. त्यामुळे या नव्या करारानंतर या कॉर्पोरेट पार्कमधील बँकेचा लीज्ड स्पेस आणखी वाढला आहे.
पुण्यातील हडपसर-मुंढवा परिसर हा कमर्शियल आणि रेसिडेन्शियल डेव्हलपमेंटसाठी महत्त्वाचा भाग मानला जातो. रोजगार केंद्रे, निवासी प्रकल्प आणि शहरातील इतर भागांशी कनेक्टिव्हिटी यामुळे या परिसरात व्यावसायिक जागांची मागणी वाढली आहे. त्यामुळे पंकज उधास यांच्या पत्नीच्या या प्रॉपर्टीचा व्यवहारही चर्चेत आला आहे.
