Prahaar Review: 26/11 च्या जखमा पुन्हा ताज्या करणारा ‘प्रहार’! राजकुमार रावचा अभिनय दमदार, पण..

Prahaar Review: मुंबईवरील 26/11 च्या दहशतवादी हल्ल्याच्या आठवणी आजही प्रत्येक भारतीयाच्या मनात ताज्या आहेत. या हल्ल्यात निष्पाप नागरिकांनी आपले प्राण गमावले, अनेक कुटुंबं उद्ध्वस्त झाली आणि संपूर्ण देश हादरला. या हल्ल्यानंतर दहशतवादी अजमल कसाबला शिक्षा मिळवून देण्यासाठी झालेली कायदेशीर लढाई आता ‘प्रहार : द अनटोल्ड स्टोरी ऑफ उज्ज्वल निकम’ या चित्रपटातून मोठ्या पडद्यावर आली आहे. अभिनेता राजकुमार रावने सरकारी वकील उज्ज्वल निकम यांची भूमिका साकारली आहे. दिग्दर्शक अविनाश अरुण यांनी या चित्रपटातून न्यायालयीन लढाई, संविधानाचं महत्त्व आणि एका वकिलाच्या वैयक्तिक आयुष्यातील संघर्ष दाखवण्याचा प्रयत्न केला आहे. मात्र, दमदार विषय असूनही हा चित्रपट प्रेक्षकांना अपेक्षित भावनिक धक्का देतो का? जाणून घेऊयात.

काय आहे ‘प्रहार’ची कथा?

चित्रपटाची सुरुवात 1993 च्या मुंबई बॉम्बस्फोट प्रकरणातील उज्ज्वल निकम यांच्या यशापासून होते. त्यानंतर काही वर्षांनी 26 नोव्हेंबर 2008 रोजी मुंबईवर दहशतवादी हल्ला होतो आणि निकम यांच्यासमोर एक मोठं आव्हान उभं राहतं. अजमल कसाबला न्यायालयात दोषी सिद्ध करण्यासाठी पुरावे, साक्षीदार आणि कायदेशीर तरतुदींच्या आधारे लढाई लढावी लागते. या चित्रपटाचं वैशिष्ट्य म्हणजे तो केवळ दहशतवादी हल्ल्याचं चित्रण करत नाही, तर त्यानंतरच्या न्यायालयीन प्रक्रियेवरही लक्ष केंद्रित करतो. कसाबला जिवंत पकडणं का आवश्यक होतं, त्याच्याविरोधात पुरावे कसे सादर करण्यात आले आणि न्याय मिळवण्यासाठी संविधानाच्या चौकटीत राहणं का महत्त्वाचं होतं, हे प्रश्न चित्रपटातून मांडले आहेत.

राजकुमार रावचा अभिनय

राजकुमार रावने उज्ज्वल निकम यांची देहबोली, बोलण्याची पद्धत आणि न्यायालयातील आक्रमकता पडद्यावर साकारण्याचा प्रयत्न केला आहे. काही प्रसंगांमध्ये त्याचा अभिनय प्रभावी ठरतो. विशेषतः न्यायालयातील युक्तिवाद आणि अंतिम टप्प्यातील संवादांमध्ये त्याची मेहनत जाणवते. मात्र, काही ठिकाणी व्यक्तिरेखेची शैली पकडण्याचा प्रयत्न अधिक जाणवतो. त्यामुळे अभिनय नैसर्गिक वाटण्याऐवजी काही प्रसंगांमध्ये थोडा बनावटी वाटू शकतो. तरीही चित्रपटातील न्यायालयीन दृश्यांमध्ये राजकुमार राव लक्ष वेधून घेतो.

ललित प्रभाकर – जयदीप अहलावतची छाप

मराठी अभिनेता ललित प्रभाकरने अजमल कसाबची भूमिका साकारली आहे. त्याच्या व्यक्तिरेखेतून कट्टरतावाद आणि दहशतवादी विचारसरणी माणसाच्या मानसिकतेवर कसा परिणाम करू शकते, याची झलक पाहायला मिळते. मात्र, कसाबच्या मानसिकतेचा हा पैलू अधिक खोलवर मांडता आला असता. जयदीप अहलावत पाकिस्तानी वकील चौधरी झुल्फिकार यांच्या भूमिकेत दिसतो. त्याचे न्यायालयीन प्रसंग आणि राजकुमार रावसोबतचे संवाद चित्रपटात रंगत आणतात. सिकंदर खेरनेही कसाबची बाजू मांडणाऱ्या वकिलाची भूमिका प्रभावीपणे साकारली आहे. वामिका गब्बी उज्ज्वल निकम यांच्या पत्नीच्या भूमिकेत दिसते.

चित्रपट कुठे कमी पडतो?

‘प्रहार’चा विषय अत्यंत गंभीर आणि भावनिक आहे. मात्र, चित्रपटात उज्ज्वल निकम यांच्या कौटुंबिक आयुष्याला बराच वेळ दिल्यामुळे मुख्य न्यायालयीन लढाईचा वेग काही ठिकाणी मंदावतो. त्यांच्या कुटुंबापासून दूर राहण्याचा संघर्ष समजण्यासारखा असला, तरी कथानक वारंवार मूळ विषयापासून दूर जातं. 26/11 च्या हल्ल्यातील पीडितांचं दुःख आणि त्यांच्या कुटुंबांनी सहन केलेली वेदना अधिक प्रभावीपणे दाखवता आली असती. एका लहान मुलाची न्यायालयातील साक्ष हा चित्रपटातील हृदयस्पर्शी क्षण ठरतो. मात्र, असे भावनिक प्रसंग सातत्याने अनुभवायला मिळत नाहीत. पटकथेत अधिक वेग आणि संपादनात अधिक कसोटी असती, तर चित्रपटाचा परिणाम आणखी खोलवर झाला असता.

पाहावा की नाही?

एकूणच, ‘प्रहार’ हा महत्त्वाच्या ऐतिहासिक घटनेनंतरच्या न्यायालयीन संघर्षाची ओळख करून देणारा चित्रपट आहे. राजकुमार रावचा प्रयत्न, कलाकारांचे अभिनय आणि न्यायव्यवस्थेवरील चर्चा ही त्याची बलस्थानं आहेत. मात्र, 26/11 च्या हल्ल्याची वेदना प्रेक्षकांपर्यंत पोहोचवण्यात चित्रपट काही प्रमाणात कमी पडतो. न्यायालयीन नाट्य, सत्यघटनांवर आधारित चित्रपट आणि गंभीर विषय आवडणाऱ्यांनी हा चित्रपट पाहण्याचा विचार करू शकतात. मात्र, मन हेलावून टाकणारा अनुभव अपेक्षित असेल, तर चित्रपटाकडून असलेल्या अपेक्षा थोड्या मर्यादित ठेवणं योग्य ठरेल.