आंटी तुम्ही बाहेर येऊन बिग बॉस खेळू नका; अंकिताच्या सासूवर भडकली रश्मी देसाई

मुंबई : 11 जानेवारी 2024 | ‘बिग बॉस 17’ सध्या सोशल मीडियावर जोरदार चर्चेत आहे. अंकिता लोखंडे आणि विकी जैन ही जोडी यंदाच्या सिझनमध्ये सर्वाधिक चर्चेत आहे. या जोडीबाबत बिग बॉसच्या माजी स्पर्धकांकडून आणि सेलिब्रिटींकडून विविध प्रतिक्रिया येत आहेत. अशातच अंकिताची खास मैत्रीण आणि टेलिव्हिजनवरील सर्वांत लोकप्रिय अभिनेत्री रश्मी देसाईने आता मौन सोडलं आहे. विकी जैनची आई आणि अंकिताची सासू रंजना जैन यांनी तिला बरंच काही सुनावल्यानंतर रश्मी अंकिताच्या बाजूने उभी राहिली आहे. रश्मीने अंकिता आणि विकीसाठी एक पोस्ट लिहिली आहे. या पोस्टमध्ये तिने विकीच्या आईलाही सुनावलं आहे. बिग बॉसच्या घराबाहेर खेळ खेळू नका, असा थेट सल्ला तिने अंकिताच्या सासूला दिला आहे. बिग बॉसच्या फॅमिली वीकदरम्यान विकीची आई घरात त्यांना भेटायला गेली होती. त्यानंतर बाहेर आल्यावर त्यांनी विविध मुलाखती दिल्या. या मुलाखतींमध्ये त्या अंकितावर टीका करताना दिसल्या आहेत.

अंकितासोबतचा जुना फोटो इन्स्टाग्राम स्टोरीमध्ये पोस्ट करत रश्मीने लिहिलं, ‘तू जशी आहेस तशीच राहा. मला तू तशीच आवडतेस. आजवर तू अनेक बदलांना सामोरं गेलीस आणि ते फक्त तुझ्यासाठीच नव्हतं. तुझ्या प्रेमाचं योगदान आणि ज्या व्यक्तीवर तू प्रेम करतेस ती व्यक्तीसुद्धा तितकीच महत्त्वाची आहे. तू तुझ्या मेहनतीने सर्व कमावलंस आणि बेधडक स्वभावामुळे तू आज अंकिता लोखंडे बनली आहेस,’ या पोस्टमध्ये रश्मीने पुढे विकीच्या आईला सुनावलं आहे.

‘..आणि मी खरंच तुझ्यावर खूप प्रेम करते. तुला या सर्वांची गरज नाही. पण खूप प्रेमाने तू हे सर्व स्वीकारलंस. हा शो काही दिवसांनी संपेल आणि हा शो म्हणजे फक्त अंकिताबद्दल नाही हे कुटुंबीयांना लवकरच समजेल अशी आशा आहे. हा शो अंकिता आणि विकी या दोघांबद्दल आहे. दोघंही सर्व गोष्टी सांभाळण्या इतपत समजूतदार आहेत. मला माहितीये आंटी, तुम्हाला कदाचित वाईट वाटू शकतं, पण ते दोघं माझे चांगले मित्र आहेत. बिग बॉस या शोचे ते दोघं स्पर्धक आहेत. त्यामुळे तुम्ही बाहेर येऊन बिग बॉस खेळू नका. जिंदगी अभी बाकी है मेरे दोस्त’, अशा शब्दांत तिने विकी जैनच्या आईला सुनावलं आहे.