घटस्फोट, डिप्रेशन, लिव्हरचा आजार.. ‘स्प्लिट्सविला 7’ फेम मराठमोळ्या मयंक पवारचं निधन कशामुळे?

‘स्प्लिट्सविला’ या रिअॅलिटी शोच्या सातव्या सिझनमधून प्रकाशझोतात आलेल्या मयंक पवारचं निधन झालं आहे. मयंकच्या अधिकृत इन्स्टाग्राम अकाऊंटवर त्याच्या निधनाची माहिती देण्यात आली आहे. 1 जानेवारी 2026 रोजी त्याने 37 वा वाढदिवस साजरा केला होता. त्याच्या निधनाच्या वृत्ताने सर्वांनाच मोठा धक्का बसला आहे. इन्स्टाग्राम अकाऊंटवर लिहिलेल्या पोस्टमध्ये म्हटलंय की, 23 फेब्रुवारी रोजी मयंकचं निधन झालं आहे. त्याच्या कुटुंबीयांनी शोकसभेची माहिती देणारी एक पोस्ट शेअर केली आहे. 25 फेब्रुवारी रोजी संध्याकाळी 5 ते 6 दरम्यान संग्राम पार्क इथल्या वाल्मिकी मंदिरात शोकसभेचं आयोजन करण्यात आलं आहे. मयंक फिटनेस फ्रिक असून त्याने सहा वेळा ‘मिस्टर इंडिया’ आणि एकदा ‘मिस्टर एशिया’चा किताब जिंकला होता.

टेलिव्हिजन शोने जरी मयंकला प्रसिद्धी मिळवून दिली असली तरी फिटनेसच त्याच्यासाठी सर्वाधिक महत्त्वाचं होतं. फिटनेसची प्रचंड आवड असलेला मयंक सेलिब्रिटी फिटनेस ट्रेनरसुद्धा बनला होता. परंतु वैयक्तिक आयुष्यात त्याला अनेक समस्यांचा सामना करावा लागला होता. पत्नीसोबत घटस्फोटानंतर तो काही महिने नैराश्यात होता. त्यातच त्याला लिव्हरच्या आजाराने ग्रासलं होतं. याचा खुलासा त्याच्या आईनेच केला होता.

View this post on Instagram

A post shared by Mayank Pawar™ (@pawarmayank)

‘वन इंडिया’शी बोलताना मयंकच्या आईने सांगितलं, “माझा मुलगा खूप मेहनती होता. फिटनेसच त्याच्यासाठी सर्वस्व होतं. परंतु घटस्फोटामुळे तो आतून खूप खचला होता. त्यातच लिव्हरच्या समस्येमुळे त्याची प्रकृती बिघडली होती. आम्ही खूप प्रयत्न केले, परंतु..” मयंकच्या निधनाच्या वृत्ताने सर्वांनाच मोठा धक्का बसला आहे. चाहत्यांनी सोशल मीडियावर पोस्ट लिहित शोक व्यक्त केला आहे.

‘स्प्लिट्सविला 7’ या शोमुळे मयंकला बरीच प्रसिद्धी मिळाली होती. या शोमध्ये त्याच्या संयमी स्वभावाचं आणि टास्कदरम्यान केलेल्या दमदार कामगिरीचं इतर स्पर्धकांकडून विशेष कौतुक झालं. नंतर त्या भागात तो या शोमधून बाहेर पडला, तेव्हा अनेकांची निराशा झाली होती. त्यावेळू परीक्षक सनी लिओनीसुद्धा भावूक झाली होती. स्प्लिट्सविलामधून बाहेर पडताना सनी लिओनी आणि निखिल चिनप्पा यांनी त्याला घट्ट मिठी मारली होती.