ते प्रेम नव्हतं, तर फक्त गरज..; बिग बॉसच्या घरातील अफेअरबद्दल काजोलची बहीण स्पष्टच बोलली..

अभिनेत्री तनिषा मुखर्जी आणि अभिनेता अरमान कोहली यांचं नातं एकेकाळी प्रचंड चर्चेत होतं. ‘बिग बॉस 7’ या रिअॅलिटी शोमध्ये दोघांमधील जवळीक वाढली होती. शोमधील त्यांची केमिस्ट्री, एकमेकांना दिलेली साथ आणि प्रेमाच्या चर्चा यामुळे ते सतत चर्चेत राहिले. मात्र, आता अनेक वर्षांनंतर तनिषाने या नात्याबद्दल धक्कादायक खुलासे केले आहेत. अरमानसोबतचं नातं हे प्रेमापेक्षा ‘ट्रॉमा बॉन्डिंग’शी संबंधित होतं, असं तिने म्हटलं आहे. तसंच, ‘बिग बॉस’च्या अनुभवातून बाहेर पडण्यासाठी आणि त्याचा मानसिक परिणाम समजून घेण्यासाठी तिला सहा महिने लागल्याचंही तिने सांगितलं.

तनिषाने अलीकडील पॉडकास्टमधील संवादात ‘बिग बॉस’च्या घरातील अनुभवांबद्दल भाष्य केलं. शोमध्ये सहभागी होताना तिला तिथल्या वातावरणाची आणि त्याचा मानसिकतेवर होणाऱ्या परिणामांची पुरेशी कल्पना नव्हती, असं तिने सांगितलं. तिच्या मते, रिअॅलिटी शोमध्ये स्पर्धकांना अनेकदा तणावपूर्ण परिस्थितींना सामोरं जावं लागतं. अशा वेळी एकत्र अडचणींचा सामना करताना दोन व्यक्तींमध्ये भावनिक जवळीक निर्माण होऊ शकते. शोमध्ये तिला अरमानसोबत वेळ घालवण्याच्या अनेक संधी मिळाल्या. दोघेही चित्रपटसृष्टीशी संबंधित असल्यामुळे त्याच्यासोबत तिला एक प्रकारचा परिचयाचा आणि आपलेपणाचा अनुभव येत होता. घरातील इतर स्पर्धकांशी मतभेद किंवा एकटेपणा जाणवत असताना अरमान तिच्या बाजूने असल्याचं तिला वाटत होतं. त्यामुळे त्यांच्यातील जवळीक वाढत गेली. मात्र, आता मागे वळून पाहताना त्या भावनांवर शोमधील परिस्थितीचा मोठा प्रभाव होता, असं तनिषाने म्हटलं आहे.

तनिषाने ‘बिग बॉस’च्या निर्मात्यांवर स्पर्धकांना विशिष्ट परिस्थितीत ठेवून त्यांच्या भावनांवर प्रभाव टाकल्याचा आरोप केला आहे. स्पर्धकांना एकाच गटात ठेवणं किंवा कठीण प्रसंगांमध्ये एकमेकांच्या जवळ आणणं यामुळे त्यांच्यात भावनिक बंध निर्माण होऊ शकतात, असं मत तिने मांडलं आहे.

शोमधून बाहेर आल्यानंतर या अनुभवाचा तिच्यावर झालेला परिणाम समजून घेण्यासाठी तिला वेळ लागला. इतकंच नव्हे तर या मानसिक अनुभवातून सावरण्यासाठी तिला मानसोपचारतज्ज्ञांची मदतही घ्यावी लागली. ‘बिग बॉस’मधील परिस्थितीमुळे निर्माण झालेल्या भावनिक गुंतवणुकीतून बाहेर पडण्यासाठी सुमारे सहा महिने लागल्याचं तिने म्हटलं आहे.

तणावपूर्ण किंवा भावनिकदृष्ट्या कठीण परिस्थितीत एकत्र राहिल्यामुळे दोन व्यक्तींमध्ये तीव्र भावनिक जवळीक निर्माण होऊ शकते. अशा जवळिकीला तनिषाने ‘ट्रॉमा बॉन्डिंग’ असं संबोधलं आहे. ‘बिग बॉस 7’दरम्यान चर्चेत आलेल्या तनिषा आणि अरमानच्या नात्याची शो संपल्यानंतरही चर्चा सुरू होती. मात्र, 2014 मध्ये दोघांचं नातं संपल्याचं वृत्त समोर आलं.