Ketaki Chitale: ‘बिग बॉस मराठी 4’मध्ये सहभागी झाल्याच्या चर्चांवर केतकी चितळेचं सडेतोड उत्तर, “पैशांसाठी मी..”
केतकी कधी तिच्या पोस्टमुळे तर कधी वादग्रस्त वक्तव्यांमुळे चर्चेत असते. त्यामुळे बिग बॉस मराठीच्या नव्या सिझनसाठी तिला नक्कीच विचारलं गेलं असणार असा अंदाज नेटकरी व्यक्त करत आहेत. या सर्व चर्चांवर खुद्द केतकीने उत्तर दिलं आहे.
टेलिव्हिजनवरील सर्वांत लोकप्रिय रिॲलिटी शो बिग बॉस मराठीचा चौथा (Bigg Boss Marathi 4) सिझन लवकरच प्रेक्षकांच्या भेटीला येणार आहे. या नव्या सिझनचा टीझर नुकताच प्रदर्शित झाला असून यामध्ये कोणकोणते सेलिब्रिटी सहभागी होऊ शकतील याविषयी नेटकरी विविध अंदाज व्यक्त करत आहेत. त्यामध्ये अभिनेत्री केतकी चितळेचं (Ketaki Chitale) नाव सर्वाधिक चर्चेत आहे. आपल्या एका फेसबुक पोस्टमुळे (FB Post) केतकी सोशल मीडियावर तुफान चर्चेत होती. केतकी कधी तिच्या पोस्टमुळे तर कधी वादग्रस्त वक्तव्यांमुळे चर्चेत असते. त्यामुळे बिग बॉस मराठीच्या नव्या सिझनसाठी तिला नक्कीच विचारलं गेलं असणार असा अंदाज नेटकरी व्यक्त करत आहेत. या सर्व चर्चांवर खुद्द केतकीने उत्तर दिलं आहे.
केतकीने बिग बॉस मराठीच्या घरात जाणार नसल्याचं स्पष्ट करत या चर्चांना पूर्णविराम दिला आहे. इतकंच नव्हे तर तिने बिग बॉसमध्ये सहभागी होण्याच्या वृत्तावर सडेतोड उत्तर दिलं आहे. केतकीने या शोच्या संकल्पनेवर टीका केली आणि पुढे म्हणाली की या शोमध्ये सहभागी होणं हे तिच्या दृष्टीने कमी दर्जाचं असेल.
काय म्हणाली केतकी?
“दरवर्षीप्रमाणे पुन्हा एकदा या चर्चांना उधाण आलंय आणि त्यामुळे पुन्हा मला उत्तर द्यावं लागतंय. बिग बॉससारख्या नकारात्मकता पसरवणाऱ्या टीव्ही शोजना मी प्रोत्साहन देत नाही. त्यामुळे अशा अर्थहीन प्रयोगात सहभागी होणं म्हणजे मी माझा दर्जा कमी करणं असेल आणि नाही. मी पैशासाठी माझा दर्जा कमी करू शकत नाही.”
बिग बॉसमध्ये सहभागी होण्याच्या चर्चांना उधाण देणाऱ्यांना ती पुढे म्हणाली, “प्रत्येक वेळी जर कोणी मला बिग बॉसमधील सहभागाबद्दल विचारण्याऐवजी एक रुपया एपिलेप्सी संशोधनासाठी दान केला असता, तर आत्तापर्यंत आपल्याकडे स्टाफची सोय झाली असतीआणि वृत्त माध्यमांनी विशेषत: बिग बॉससंदर्भात माझं नाव छापताना प्रत्येक वेळी हजार रुपये दान केले पाहिजेत.”
