Yami Cameo : ‘धुरंधर: द रिव्हेंज’साठी यामी गौतमला मिळाली होती मोठी रक्कम ? अभिनेत्रीने सांगितलं सत्य !

Yami Cameo : आदित्य धरचा ‘धुरंधर: द रिव्हेंज’ हा या वर्षातील सर्वात मोठा चित्रपट ठरला आहे. त्याच्या बरोबरीने तर सोडाच, त्याच्या जवळपास जाणारी कमाई देखील इतर कोणताही चित्रपट करू शकलेला नाही. ‘हनुमान अंश’ चित्रपटाल जरी बराच फायदा झाला असला तरी, अद्याप टॉरवर रणवीर सिंगचाच चित्रपट आहे. जर तुम्ही थिएटरमध्ये जाऊन हा चित्रपट पाहिला असेल तर हे माहीत असेलच की या चित्रपटाच्या सुरूवातीलाच अभिनेत्री यामी गौतमला (Yami Gautam) थँक्स म्हणत तिचे विशेष आभार मानले गेलेत. या चित्रपटात तिचा कॅमिओदेखील होता, ज्यामध्ये ती नर्स बनून, रणवीर सिंगच्या समोरचं त्याच्या शत्रूंचं काम संपवते. तिचा रोल, ती भूमिका अनेकांना आवडली होती. मात्र त्यानंतर अशा अनेक अफवा उठल्या होत्या की यामीने या चित्पटासाठी फी म्हणून मोठी रक्कम स्वीकारली. पण आता यावर यामीने मौन सोडलं असून कोणतीही फी घेतली नसल्याचं स्पष्ट केलं.

यामी गौतमचा ‘नई नवेली’ हा चित्रपट प्रदर्शित झाला असून, सध्या ती या चित्रपटाच्या प्रमोशनमध्ये व्यस्त आहे. नुकतीच यामी ‘कोण होणार करोडपती’ या शोमध्ये पोहोचली होती. यावेळी तिने ‘धुरंधर: द रिव्हेंज’ या चित्रपटातील आपल्या कॅमिओसाठी मानधन घेतलं होतं की नाही, याबाबत खुलासा केला.

फी बद्दल काय म्हणाली यामी ?

सोनी लिव्हच्या अधिकृत इन्स्टाग्राम पेजवर आगामी भागाचा एक प्रोमो शेअर करण्यात आला आहे. या व्हिडिओमध्ये शोची होस्ट, माधुरी दीक्षित यामीला सांगते की तिने ‘धुरंधर: द रिव्हेंज’ हा चित्रपट पाहिला असून तिला तो खूप आवडला. यानंतर त्या चित्रपटातील यामीच्या कॅमिओचा तिने उल्लेख केला आणि तिला विचारलं की या भूमिकेसाठी तिला पैसे मिळाले होते की तिचे पती आदित्य धर यांनी केवळ चित्रपटात काम करण्याची विनंती केली होती?

यावर यामी गौतम म्हणाली, “ मी कुठेतरी वाचलं होतं की या कॅमिओसाठी मला खूप मोठा चेक मिळाला. पण ते वाचून मला प्रश्न पडला की, हे काय आहे? खरंतर मला असं वाटतं की, काही गोष्टी अनमोल असतात. आदित्यने मला सांगितलं की, ‘यामी, मला तू माझ्या चित्रपटात फक्त शुभशकुन म्हणून यावंस आणि तुझ्या अभिनयाने सगळ्यांना प्रभावित करावंस, असं वाटतं’. या चित्रपटात काम करताना मला खूप मजा आली. सर्वोत्तम दिग्दर्शकांपैकी एक असलेल्या दिग्दर्शकाच्या मार्गदर्शनाखाली काम करणं, हेच माझं मानधन होतं.” असं यामीने स्पष्ट केलं.

माधुरीने केली यामीची प्रशंसा

यानंतर माधुरी दीक्षितने यामी गौतमचं कौतुक केलं. त्या म्हणाल्या, “‘धुरंधर: द रिव्हेंज’मध्ये तुला पाहणं खूप मजेशीर होतं”. दरम्यान, या चित्रपटात यामीने शाजिया बानो ही छोटीशी भूमिका साकारली आहे. ती एक नर्स दाखवली असून, प्रत्यक्षात पाकिस्तानमध्ये कार्यरत असलेली भारतीय गुप्तहेर असते. आपल्या छोट्याशा भूमिकेतूनही यामीने प्रेक्षकांचं लक्ष वेधून घेतलं.