सर्वांचीच जळाली.., ‘धुरंधर 2’वरून कॉमेडियनचा बॉलिवूडला टोला; म्हणाला “बॉम्ब ल्यारीमध्ये फुटले, धूर मात्र..”

आदित्य धर दिग्दर्शित आणि रणवीर सिंहची मुख्य भूमिका असलेला ‘धुरंधर : द रिव्हेंज’ हा चित्रपट बॉक्स ऑफिसवर कमाईचे सर्व विक्रम मोडतोय. या चित्रपटाने प्रदर्शनाच्या 18 दिवसांत छप्परफाड कमाई करत इतिहास रचला आहे. अठराव्या दिवशी हा चित्रपट 1000 कोटींच्या क्लबमध्ये समाविष्ट झाला असून भविष्यात कमाईत आणखी वाढ होण्याची शक्यता आहे. ‘धुरंधर 2’ हा कमाईच्या बाबतीतही धुरंधर ठरत असला तरी काहीजण त्यावर ‘प्रोपगेंडा’ (प्रचारकी) असल्याची टीका करत आहेत. आता कॉमेडियन जाकिर खान याने ‘धुरंधर 2’च्या यशावरून बॉलिवूडमधल्या अनेकांना अप्रत्यक्षपणे टोला लगावला आहे. एका पुरस्कार सोहळ्यातील त्याचा व्हिडीओ सध्या सोशल मीडियावर तुफान चर्चेत आला आहे. “धुरंधरच्या यशाने सर्वांचीच जळाली आहे”, अशा शब्दांत त्याने निशाणा साधला आहे.

रविवारी पार पडलेल्या ‘चेतक स्क्रीन अवॉर्ड्स 2026’मध्ये जाकिर खान, आलिया भट्ट आणि सुनील ग्रोवर यांनी सूत्रसंचालनाची जबाबदारी पार पाडली. या पुरस्कार सोहळ्यातील बरेच फोटो आणि व्हिडीओ आता सोशल मीडियावर व्हायरल होत आहेत. यापैकी एक क्लिक जाकिर खानचा असून यामध्ये तो ‘धुरंधर’ आणि ‘धुरंधर 2‘च्या ब्लॉकबस्टर यशावरून बॉलिवूडवर उपरोधिक टोला लगावल्याचं दिसून येत आहे. हे दोन्ही चित्रपट बॉक्स ऑफिसवर तुफान गाजले आहेत.

पहा व्हिडीओ-

Zakir Khan at Screen Awards naming and shaming Bollywood for DHURANDHAR.

This is the power of Real Cinema 🔥🔥#Dhurandhar #DhurandharTheRevenge pic.twitter.com/hYIl8I3Awp

— Junior Ranveer (@itsSmitBhatt) April 5, 2026

या क्लिपमध्ये जाकिर म्हणताना दिसतोय, “तुम्ही कितीही शुभेच्छा देणाऱ्या पोस्ट लिहिल्या, कितीही स्टोरी पोस्ट केल्या, कितीही मुलाखतीत सांगा की हा माझा आवडता चित्रपट आहे, परंतु सत्य हेच आहे की धुरंधरमुळे सर्वांचीच जळाली आहे. बम फिल्म में फुटे ल्यारी में पर धुआं उडा है ब्रांदा से जुहू में (चित्रपटात ल्यारीमध्ये बॉम्ब फुटले आहेत, पण त्याचा धूर वांद्र्यापासून जुहूपर्यंत पोहोचला आहे.)” जाकिरच्या या क्लिपवर नेटकऱ्यांनी विविध प्रतिक्रिया दिल्या आहेत.

‘हे सत्य आहे, ज्यावर कोणीच हसत नाहीये’, असं एकाने लिहिलंय. तर ‘जाकिर खान फॅक्ट्स (तथ्ये) सांगतोय’, असं दुसऱ्याने म्हटलंय. ‘प्रेक्षक फक्त दिखावा करत आहेत, परंतु त्यांचा खरा चेहरा ते लपवू शकत नाहीत’, अशीही प्रतिक्रिया एका युजरने दिली आहे. ‘जे जसं आहे, त्याला तसं बोलण्याची हिंमत याच्यात आहे’, अशा शब्दांत काहींनी जाकिरचं कौतुक केलं आहे.