Dasara 2026: दसऱ्याला केली जाते शमीच्या झाडाची पूजा, आरोग्य आणि सौंदर्यासाठी कसे ठरते फायदेशीर?

वाईटावर चांगल्याच्या विजयाचे प्रतीक म्हणून दसरा हा सण मोठ्या उत्साहात साजरा केला जातो. या वर्षी २० ऑक्टोबर रोजी दसरा साजरा केला जाईल. या दिवशी आपट्याच्या पानांप्रमाणेच शमीच्या झाडाची पूजा करण्याची परंपरा आहे. धार्मिक मान्यतेनुसार, दसऱ्याच्या दिवशी शमीच्या पानांची पूजा केल्याने देवी लक्ष्मीचा आशीर्वाद मिळतो. या झाडाला धार्मिकदृष्ट्या महत्त्व आहेच, पण आयुर्वेदातही त्याच्या विविध भागांचा उल्लेख आढळतो. शमीच्या झाडाचा पारंपरिक औषधी उपयोग त्वचा आणि आरोग्याशी संबंधित काही समस्यांसाठी केला जातो. शमीचे झाड आरोग्य आणि सौंदर्यासाठी कसे फायदेशीर आहे जाणून घ्या.

त्वचेच्या समस्यांसाठी – पारंपरिक उपचारांमध्ये शमीच्या लाकडाचा वापर फोड आणि पिंपल्स सारख्या त्वचेच्या समस्यांसाठी केला जातो. त्वचेवर फोड आणि पिंपल्स आल्यास शमीच्या लाकडाला घासून लावल्याने अशा समस्यांपासून लवकर आराम मिळतो.

डोळ्यांच्या त्रासासाठी – तांब्याच्या भांड्यात तूप, जव आणि शमीची पाने बारीक करून मिक्स करा. ते कोरडे करून डोळ्यांना लावल्याने डोळ्यांचे दुखणे बरे होते.

– कोलेस्टेरॉलसाठी – शमीच्या पानांमधील काही घटकांमध्ये अँटिऑक्सिडंट गुणधर्म असल्याचे अभ्यासले गेले आहे. ते रक्तातील लिपिडचे प्रमाण नियंत्रित करतात. ते खराब कोलेस्टेरॉल (LDL) कमी करतात आणि चांगले कोलेस्ट्रॉल वाढवतात.

जुलाबाच्या त्रासासाठी – पारंपरिक उपायांमध्ये शमीची पाने, काळी मिरी आणि मध यांचा वापर सांगितला जातो. शमीची पाने धुवून काळी मिरी आणि मधासोबत सेवन केल्याने डायरियाच्या समस्येपासून आराम मिळतो.

खाज येत असल्यास – शमीची पाने आणि दही एकत्र करून लेप लावण्याचा पारंपरिक उपाय सांगितला जातो. दही आणि शमीच्या पानांची पेस्ट बनवून खाज येत असलेल्या भागावर लावल्यास आराम मिळू शकतो.

लघवीच्या समस्यांसाठी – लघवी करताना जळजळ होत असल्यास शमीच्या पानांचा वापर करण्याचे काही पारंपरिक उपाय सांगितले जातात. शमीची पाने बारीक करून त्यात पाणी घालून कोमट करा. आता ते नाभीमध्ये लावा. यामुळे लघवी रोखून धरण्याची समस्या कमी होण्यास मदत होईल.

शरीरातील उष्णतेसाठी – शमीच्या पानांचा रस, पाणी, जिरे आणि साखर एकत्र घेण्याचा पारंपरिक उपाय सांगितला जातो. शमीच्या पानांचा रस काढून पाण्यात जिरे आणि साखर मिसळून प्यायल्याने आराम मिळतो.

(डिस्क्लेमर: बातमीत दिलेल्या माहितीला आम्ही दुजोरा देत नाही. वरील माहिती उपलब्ध स्त्रोतावरून देण्यात आली आहे. कोणताही उपचार करण्यापूर्वी तज्ज्ञ डॉक्टरांकडून वैद्यकीय सल्ला घेऊनच उपचार करावेत.)