अमेरिका-इराणमध्ये युद्धाचे ढग, अमेरिका आणि चीनचे त्यांच्या नागरिकांना बाहेर पडण्याचे आदेश
अमेरिकेने आणि चीनने त्यांच्या नागरिकांना इस्राईल आणि वेस्ट बँक परिसरात प्रवास न करण्याचे आदेश दिले आहेत. इराणमध्ये जाऊ नये. जे आधीच तेथे आहेत त्यांना तातडीने इराण सोडावे असेही आदेश देण्यात आले आहेत.
मध्य पूर्वेत तणाव वाढत चालला असून अमेरिका आणि इराणचे युद्ध जाहीर होण्याची शक्यता वाढली आहे. अमेरिकेने इस्राईलमध्ये तैनात आपल्या अनावश्यक सरकारी कर्माचाऱ्यांना आणि त्यांच्या कुटुंबियांना तेथून निघण्याचे आदेश दिले आहेत. दुसरीकडे इस्राईलमधील अमेरिकन राजदूत माईक हकाबी यांनी दुतावासातील कर्मचाऱ्यांना ईमेल पाठवून जे लोक इस्राईल सोडू इच्छीत आहेत, त्यांना आज तेथून निघण्याचे आदेश दिले आहेत. हकाबीने पाठवलेल्या इमेलमध्ये म्हटले आहे की विमानांच्या तिकीटांची मागणी वाढू शकते. यासाठी लागलीच विमानांची तिकीटे बुक करुन आधी देशातून बाहेर पडावे. नागरिकांनी घाबरु नये. परंतू जे जाऊ इच्छीत आहेत त्यांनी उशीर करु नये असेही म्हटले आहे.
इराणच्या एका मोठ्या धर्मगुरुंनी सांगितले की जर अमेरिकेसोबत सुरु असलेली बोलणी जर फिस्कटली तर युद्ध देखील होऊ शकते. फार्स प्रांतातील सुप्रीम लीडर आयातुल्ला अली खामेनेई यांचे प्रतिनिधी लुत्फोल्लाह देझकाम यांनी सांगितले की बैठकीतील निकाल चांगला आला नाही किंवा बोलणी निष्फळ ठरली तर पुढचा रस्ता युद्धाचा देखील असू शकतो. ते म्हणाले की इराण मजबूत स्थितीत बोलणी करत आहे. युद्धाचे गंभीर परिणाम होतील हे दुसऱ्या बाजूला समजले तरच बोलणी फायदेशीर ठरतील असेही ते म्हणाले.
US स्टेट डिपार्टमेंटने ट्रॅव्हल एडव्हायझरी अपडेट केली आहे. सुरक्षेच्या कारणाने नॉन-इमर्जन्सी अमेरिकन कर्मचारी आणि त्यांच्या कुटुंबियांना इस्राईल सोडण्यास मंजूरी दिली आहे. दूतावास काही भाग, उदा. जेरुसेलमची ओल्ड सिटी आणि वेस्ट बँकमध्ये कर्मचाऱ्यांना प्रवासावर विना सुचना बंदी घालू शकतो. अमेरिकन नागरिकांना सल्ला दिला आहे की त्यांनी इस्राईल आणि वेस्ट बँक परिसरात प्रवास करण्याचा पुनर्विचार करावा. गाझात न जाण्याच्या सख्त सूचना आहेत. लेबनॉन आणि सिरीया सीमेपासून ४ किमी आणि गाझाच्या सीमेपासून ११.३ किमी आत जाऊ नये. लोकांनी सतर्क राहावे आणि गर्दी आणि निदर्शने यापासून दूर राहावे असाही सल्ला देण्यात आला आहे.
चीनने नागरिकांना इराण सोडण्यास सांगितले
दुसरीकडे चीनने देखील इराण सोडण्याचा सल्ला त्यांच्या नागरिकांना दिला आहे. चीनच्या परराष्ट्र मंत्रालय आणि इराण येथील त्यांच्या दुतावासाने त्यांच्या नागरिकांना सध्या इराणला जाऊ नये असे म्हटले आहे. जे लोक आधीपासूनच इराणमध्ये आहेत त्यांनी सावध रहावे.आणि तेथून लागलीच बाहेर पडावे. इराण आणि आजूबाजूच्या देशातील चीनी दुतावासांना चीनी नागरिकांना तेथून बाहेर पडण्यासाठी कमर्शियल फ्लाईट वा जमीनीमार्गे बाहेर पडण्यास आवश्यक मदत करावी असेही आदेश चीनने दिले आहेत.
