भारतासोबत ट्रेड डील करण्यासाठी अमेरिका का तयार? मोदींच्या मूक मुत्सद्देगिरीचा फायदा?
अमेरिकेचे राष्ट्राध्यक्ष डोनाल्ड ट्रम्प यांनी सोमवारी भारतासोबत ट्रेड डीलची घोषणा केली. या करारानुसार भारतीय वस्तूंवरील टॅरिफ 50 टक्क्यांवरून 18 टक्क्यांपर्यंत कमी केलं गेलं आणि रशियन तेल खरेदीशी संबंधित अतिरिक्त 25 टक्के दंड रद्द केला गेला.
अमेरिकेचे अध्यक्ष डोनाल्ड ट्रम्प हे त्यांच्या दुसऱ्या कार्यकाळात 80 वर्षांपासून अस्तित्वात असलेल्या जागतिक व्यवस्थेला आक्रमकपणे आव्हान देत आहेत. दुसऱ्या महायुद्धानंतर अमेरिकेनं बांधलेल्या जागतिक व्यवस्थेच्या चौकटीत ‘मेक अमेरिका ग्रेट अगेन’ (अमेरिकेला पुन्हा महान बनवा) हे ध्येय साध्य करता येणार नाही, असं त्यांचं मत आहे. म्हणूनच अमेरिकेच्या परराष्ट्र धोरणात आक्रमकता आणि अस्वस्थता यांचं मिश्रण दिसून येतं. एकेकाळी मुक्त व्यापार आणि नियमांवर आधारित जागतिक व्यवस्थेचं कट्टर समर्थक असलेलं अमेरिका आता दररोज कोणत्या ना कोणत्या देशावर टॅरिफ वाढवण्याची घोषणा करत आहे. इतकंच नव्हे तर आता ते कोणत्याही देशाच्या सार्वभौमत्वाचंही उल्लंघन करण्यापासून कचरत नाही आहेत. आंतरराष्ट्रीय राजकारण सध्या एक बदलातून जात आहे. अमेरिका आणि युरोप ऐतिहासिक भागीदारीकडे दुर्लक्ष करून त्यांचे संबंध पुन्हा प्रस्थापित करत आहेत. तर रशियाचे राष्ट्राध्यक्ष व्लादिमीर पुतीन यांना एक असं त्रिपक्षीय जग हवंय, जे मॉस्को, वॉशिंग्टन आणि बीजिंग यांच्यासोबत मिळून आकार देऊ शकेल. ...
