भारत, पाकिस्तान की चीन… युद्धाचा सर्वाधिक फटका कोणत्या देशाला? IMF च्या आकड्यांनी जगभरात खळबळ
IMF War impact Report : आंतरराष्ट्रीय नाणेनिधीने एक अहवाल जारी केला आहे, यात इराण युद्धामुळे जागतिक अर्थव्यवस्थेची गती मंदावल्याचे समोर आले आहे. यामुळे अनेक देशांना मोठा फटका बसला आहे.
इराण आणि अमेरिकेच्या युद्धामुळे संपूर्ण जगाला फटका बसला आहे. अनेक देशांच्या विकास दरावर याचा परिणाम झाला आहे. अशातच आता आंतरराष्ट्रीय नाणेनिधीने एक अहवाल जारी केला आहे, यात इराण युद्धामुळे जागतिक अर्थव्यवस्थेची गती मंदावल्याचे समोर आले आहे. या वर्षाच्या सुरुवातीला अर्थव्यवस्थेत दिसत असलेली तेजी आता थांबली आहे. IMF ने 2026 साठी जागतिक अर्थव्यवस्था वाढीचा अंदाज 3.4% वरून कमी करून 3.1% केला आहे. जर परिस्थिती अधिक बिघडली, तर हा दर 2% पर्यंत घसरू शकतो आणि जगभरात महागाई 6% पर्यंत पोहोचू शकते. हा संपूर्ण जगाला मोठा धक्का.
आंतरराष्ट्रीय नाणेनिधीचे मुख्य अर्थतज्ज्ञ पियरे-ओलिव्हिएर गॉरिंचास यांनी सांगितले की, मध्यपूर्वेतील युद्ध हे जागतिक अर्थव्यवस्थेसाठी मोठा धक्का आहे. यामुळे तेल आणि इतर वस्तूंच्या किंमती वाढल्या आहेत, त्यामुळे महागाई वाढत आहे. या युद्धाचा सर्वाधिक परिणाम पुरवठ्यावर झाला आहे. होर्मूज सामुद्रधुनीतील अडथळे आणि परिसरातील नुकसानामुळे तेल पुरवठा प्रभावित झाला आहे. त्यामुळे जगाच्या अर्थव्यवस्थेवर बसला आहे.
अमेरिकेत मंदीचा धोका
या युद्धामुळे अमेरिकेत पेट्रोलच्या किंमती वाढल्या आहेत. अर्थतज्ज्ञांच्या मते, यामुळे ट्रम्प यांच्या देशात मंदी येण्याचा धोका वाढला आहे. IMF च्या मते, 2026 मध्ये अमेरिकेची अर्थव्यवस्था 2.3% दराने वाढेल, जो आधीच्या अंदाजापेक्षा 0.1% ने कमी आहे. 2027 साठी 2.1% वाढीचा अंदाज थोडा सुधारित मानला जात आहे.
G7 देशांमध्ये ब्रिटनला सर्वाधिक फटका
G7 देशांमध्ये ब्रिटनला सर्वाधिक नुकसान झाले आहे. 2026 साठी त्याचा वाढ दर 0.5% ने कमी करून 0.8% केला आहे, तर 2027 साठी तो 1.3% राहण्याचा अंदाज आहे. सौदी अरेबियालाही मोठा फटका बसला आहे. 2026 साठी त्याचा वाढ दर 1.4% ने कमी करून 3.1% केला आहे. मात्र, 2027 मध्ये वाढून होऊन तो 4.5% पर्यंत पोहोचण्याची शक्यता आहे.
चीन आणि कॅनडालाही फटका
चीन आणि कॅनडाच्या अर्थव्यवस्था वाढीच्या दरात 0.1% ने घट झाली आहे. 2026 साठी चीनच्या आर्थिक वाढीच्या अंदाजात 0.1% ने घट करण्यात आली आहे, तर 2027 च्या अंदाजात कोणताही बदल नाही. कॅनडासाठीही 2026 चा अंदाज 0.1% ने कमी करण्यात आला आहे, तर 2027 साठी कोणताही बदल नाही.
भारत-पाकिस्तानची स्थिती चांगली
भारताची स्थिती इतर देशांच्या तुलनेने चांगली आहे. 2026 आणि 2027 साठी भारताच्या अंदाजात 0.1% ने वाढ करण्यात आली आहे. 2025 मध्ये भारताचा वाढ दर 7.6% होता, तर 2026 आणि 2027 मध्ये तो 6.5% राहू शकतो. पाकिस्तानसाठी सर्वाधिक सुधारणा दिसून आली आहे. 2026 साठी अंदाजात 0.4% आणि 2027 साठी 0.6% ने वाढ करण्यात आली आहे. पाकिस्तानच्या अर्थव्यवस्था वाढीचा दर 2025 मध्ये 3.89%, 2026 मध्ये 3.6% आणि 2027 मध्ये 3.5% राहण्याची शक्यता आहे.
