Iran Israel War : जग हादरलं! इराणचा इस्रायलवर सर्वात मोठा हल्ला, 105 क्षेपणास्त्र डागले; आता युद्ध आणखी भडकणार

Iran Attack On Israel : गेल्या अनेक दिवसांपासून अमेरिका आणि इराण यांच्यात मोठा तणाव निर्माण झाला होता. आम्ही कोणत्याही क्षणी इराणवर हल्ला करू, असे अमेरिकेकडून सातत्याने सांगितले जात होते. विशेष म्हणजे अमेरिकन सैन्याने त्यासाठी तयारीही केली होती. असे असतानाच आता मोठं युद्ध पेटलं आहे. अमेरिका आणि इस्रायल यांनी संयुक्तपणे इराणवर मोठे हल्ले केले आहेत. या हल्ल्यांत दोन्ही देशांनी इराणवर क्षेपणास्त्र डागली आहेत. हा हल्ला होताच इराणनेही तुम्ही युद्ध चालू केले आता आम्ही ते संपवू असा इशारा देत भविष्यात या युद्धाची स्थिती आणखी भीषण होण्याची शक्यता व्यक्त केली जात आहे. या सर्व घडामोडी घडत असताना आता इराणने सांगितल्याप्रमाणे जोरदार प्रतिहल्ला केला आहे. इराणने इस्रायलवर तब्बल 105 क्षेपणास्त्र डागले आहेत.

इराणच्या कोणकोणत्या भागांवर हल्ले

इस्रायल आणि अमेरिकेने इराणवर हल्ला केल्यानंतर सध्या जगभरात तणावाची स्थिती आहे. इस्रायलने इराणवर केलेल्या या हल्ल्याला इम्प्रेसिव्ह स्ट्राईक असे म्हटले आहे. मिळालेल्या माहितीनुसार तेहरान, इस्फहान, कोम, खोर्रमाबाद यासह इतरही काही शहरांत हल्ले केले आहेत. इरारणमधील तेहरान येथील विद्यापीठ रोड, सर्वोच्च न्यायालय, न्याय मंत्रालय या महत्त्वाच्या परिसरातही हल्ले करण्यात आले आहेत. या हल्ल्यात इराणचे सर्वोच्च नेते अयातुल्ला अली खामैनी यांचे निवासस्थानदेखील उद्ध्वस्त करण्यात आल्याचे सांगितले जात आहे. हा हल्ला होण्याआधीच खामैनी यांना सुरक्षित ठिकाणी हलवण्यात आल्याची माहिती मिळत आहे.

इराणने केला जोरदार हल्ला, 105 क्षेपणास्त्र डागले

इस्रायल आणि अमेरिकेने हल्ले केल्यानंतर आता इराण दा देशदेखील पेटून उठला आहे. इराणने इस्रायलवर तब्बल 105 क्षेपणास्त्र डागल्याचे सांगितले जात आहे. या हल्ल्यात चाबहार बंदरालाही लक्ष्य करण्यात आले आहे. इस्रायलनेही हे हल्ले झाल्याचे कबूल केले आहे. इराणने डागलेली क्षेपणास्त्रे हवेतच नष्ट करण्याचा इस्त्रायलकडून प्रयत्न केला जात आहे. दरम्यान, आता इस्रायलला इराणने प्रत्युत्तर दिल्यानंतर आता भविष्यात हे युद्ध आणखी चिघळण्याची शक्यता व्यक्त केली जात आहे. त्यामुळे भविष्यात नेमकं काय घडणार? हे पाहणे महत्त्वाचे ठरणार आहे.