इराणचा खात्मा करण्यासाठी अणुबॉम्ब वापरणार? डोनाल्ड ट्रम्प यांच्या मनात नेमकं काय? व्हाईट हाऊसने सांगितला प्लॅन
US vs Iran : डोनाल्ड ट्रम्प यांनी इराणची सभ्यता संपवण्याचा इशारा दिला आहे. यासाठी अमेरिका अणुबॉम्ब वापरणार असल्याचे बोलले जात आहे. यावर आता व्हाईट हाऊसने भाष्य केले आहे.
अमेरिकेचे राष्ट्राध्यक्ष डोनाल्ड ट्रम्प यांनी इराणची सभ्यता संपवण्याचा इशारा दिला आहे. त्यामुळे संपूर्ण जगात खळबळ उडाली आहे. ट्रम्प यांनी ‘एक संपूर्ण सभ्यता आज रात्री नष्ट होईल, जी पुन्हा कधीही परत आणता येणार नाही. मला असे व्हावे असे वाटत नाही, पण कदाचित तसे होईल. आज रात्री आपल्याला कळेल, जे जगाच्या दीर्घ आणि गुंतागुंतीच्या इतिहासातील सर्वात महत्त्वाच्या क्षणांपैकी एक असेल.’ असा इशारा दिला आहे. त्यामुळे आता अमेरिका आता इराणवर अणुबॉम्ब टाकणार का? असा प्रश्न उपस्थित होत आहे. यावर आता व्हाइट हाऊसने भाष्य केले आहे.
ट्रम्प इराणवर अणुबॉम्ब टाकणार?
डोनाल्ड ट्रम्प इराणवर अणुबॉम्ब टाकणार असल्याची चर्चा असताना आता अमेरिकेने स्पष्ट केले आहे की ते इराणवर अणुबॉम्ब हल्ला करणार नाहीत. व्हाईट हाऊसने सोशल मीडिया प्लॅटफॉर्म X वर पोस्ट करत म्हटले की, ‘आम्ही इराणवर अणुहल्ला करण्याचा कोणताही विचार करत नाही.’ अमेरिकेचे उपराष्ट्राध्यक्ष जेडी वॅन्स यांनी यापूर्वी म्हटले होते की अमेरिकेकडे अजून अनेक प्रकारची शस्त्रे आहेत, ज्यांचा वापर अद्याप केलेला नाही. त्यांच्या या विधानानंतर अध्यक्ष डोनाल्ड ट्रंप इराणवर अणुहल्ला करू शकतात, अशा चर्चा सुरू झाल्या होत्या. मात्र आता अमेरिकेने आपली भूमिका स्पष्ट केली आहे.
इराणला गंभीर इशारा
डोनाल्ड ट्रंप यांनी इराणवर भीषण हल्ला करण्याबाबत भाष्य केले आहे. दोन्ही देशांमधील शांतता चर्चेच्या मुदतीची वेळ जवळ येत असताना, इराण चर्चेसाठी तयार नसल्याचे दिसत आहे. त्यामुळे पश्चिम आशियातील सुरू असलेल्या संघर्षात अमेरिकेची पुढची भूमिका काय असेल, याकडे सर्वांचे लक्ष लागले आहे. डोनाल्ड ट्रम्प यांनी इराणला कठोर इशारा देत म्हटले होते की, ‘जर मंगळवार रात्री 8 वाजेपर्यंत (ET) समाधानकारक करार झाला नाही, तर इराणची संपूर्ण सभ्यता आज रात्रीच नष्ट होऊ शकते.’ या इशाऱ्यामुळे अणुहल्ल्याच्या शक्यतांबाबतही चर्चा रंगल्या होत्या, मात्र आता याला पूर्ण विराम मिळाला आहे.
अणुहल्ला पर्याय नाही
अमेरिकेचे उपराष्ट्राध्यक्ष जेडी वॅन्स यांच्या वक्तव्यानंतर अणु हल्ल्याच्या चर्चांना वेग आला होता. मात्र आता व्हाईट हाऊसने स्पष्टीकरण देत अण्वस्त्रांच्या वापराला स्पष्ट नकार दिला. त्यांनी ठामपणे सांगितले की वॅन्स यांच्या वक्तव्याचा अर्थ अणु पर्याय असा नाही. त्यामुळे इराणवरील मोठे संकट आता टळले आहे.
