किती लांब असतो कान्स फेस्टिव्हलचा रेड कार्पेट? जाणून घ्या सविस्तर
कान्स फिल्म फेस्टिव्हलचा प्रसिद्ध रेड कार्पेट 'पॅलेस डे फेस्टिव्हल्स' इमारतीच्या प्रवेशद्वारावर अंथरला जातो. पण या जगप्रसिद्ध रेड कार्पेटची लांबी किती असते, त्यावर किती पायऱ्या आहेत आणि तो दिवसातून किती वेळा बदलला जातो ? चला, जाणून घेऊया या दिमाखदार सोहळ्यामागची काही खास माहिती!
कान्स फिल्म फेस्टिव्हल म्हटलं की डोळ्यासमोर येतात जगभरातील Filmstars, त्यांचे आकर्षक पोशाख आणि तो जगप्रसिद्ध रेड कार्पेट. फ्रान्समध्ये दरवर्षी रंगणाऱ्या या सोहळ्यात सिनेजगतातील अनेक दिग्गज आणि नवोदित कलाकार सहभागी होतात. भारतीय सेलिब्रिटींची उपस्थितीही इथे लक्षणीय असते आणि त्यांचे रेड कार्पेटवरील लूक नेहमीच चर्चेचा विषय ठरतात. हजारो कॅमेऱ्यांच्या लखलखाटात रेड कार्पेटवरून चालतानाचे त्यांचे फोटो आणि व्हिडिओ सोशल मीडियावर धुमाकूळ घालतात.
पण या दिमाखदार रेड कार्पेटबद्दल काही खास गोष्टी आहेत, ज्या कदाचित तुम्हाला माहीत नसतील. त्याची एक विशिष्ट लांबी ठरलेली असते आणि तो किती वेळा बदलावा लागतो याचेही काही नियम आहेत!
रेड कार्पेटची लांबी आणि पायऱ्या
कान्स फिल्म फेस्टिव्हलचा मुख्य कार्यक्रम ‘पॅलेस डे फेस्टिव्हल्स’ या भव्य इमारतीत होतो. या इमारतीच्या मुख्य प्रवेशद्वारावर हा प्रतिष्ठित रेड कार्पेट अंथरला जातो. या रेड कार्पेटची एकूण लांबी तब्बल ६० मीटर इतकी असते. या लांबसडक कार्पेटवर २४ पायऱ्या आहेत. प्रत्येक सेलिब्रिटीला या पायऱ्या चढून, रेड कार्पेटवरून चालत जाऊन मुख्य सभागृहात प्रवेश करायचा असतो. या दरम्यान, जगभरातील फोटोग्राफर्स त्यांचे फोटो टिपण्यासाठी सज्ज असतात.
दिवसातून तीन वेळा नवा रेड कार्पेट!
तुम्हाला ऐकून आश्चर्य वाटेल, पण हा ६० मीटर लांबीचा रेड कार्पेट दिवसातून एकदा किंवा दोनदा नाही, तर चक्क तीन वेळा बदलला जातो! होय, प्रत्येक मोठ्या स्क्रीनिंगच्या किंवा महत्त्वाच्या इव्हेंटच्या आधी जुना रेड कार्पेट काढून नवीन, ताजा रेड कार्पेट अंथरला जातो.
यामागचं मुख्य कारण आहे स्वच्छता आणि कार्यक्रमाचा Grandeur इतके लोक सतत यावरून चालत असल्याने तो लवकर खराब होऊ शकतो, त्यावर धुळीचे किंवा इतर डाग पडू शकतात. फोटो आणि व्हिडिओमध्ये रेड कार्पेट एकदम स्वच्छ, सुंदर आणि ‘परफेक्ट’ दिसावा, यासाठी ही विशेष खबरदारी घेतली जाते. कान्स फेस्टिव्हलच्या आयोजकांसाठी प्रत्येक गोष्टीत परफेक्शन असणं महत्त्वाचं असतं, आणि रेड कार्पेटही त्याला अपवाद नाही.
रेड कार्पेट पलीकडचा कान्स
जरी रेड कार्पेट आणि त्यावरील सेलिब्रिटीजची फॅशन हा कान्स फेस्टिव्हलचा सर्वात जास्त चर्चिला जाणारा भाग असला, तरी हा महोत्सव केवळ तेवढ्यापुरताच मर्यादित नाही. इथे जगभरातील उत्कृष्ट सिनेमांचं प्रदर्शन होतं, नवीन दिग्दर्शक आणि कलाकारांना आंतरराष्ट्रीय व्यासपीठ मिळतं, सिनेसृष्टीतील महत्त्वाच्या विषयांवर चर्चासत्रं आयोजित केली जातात आणि भविष्यातील सिनेमांसाठी मोठे करारही होतात. अनेक कलाकारांच्या आणि तंत्रज्ञांच्या कामाचा गौरव इथे केला जातो.
