डोक्यावर 12 लाखांचं बक्षीस, जहाल नक्षलवादी रमेश मडावी याला 10 वर्षांनी अटक

गोंदिया : गोंदिया पोलिसांनी तब्बल 10 वर्षांपासून फरार असलेल्या जहाल नक्षलवाद्याला मोठ्या शिताफीने छत्तीसगढ राज्यातून अटक केली आहे. या जहाल नक्षलवाद्याचे नाव रमेश मडावी असं आहे. या नक्षलवाद्याच्या डोक्यावर महाराष्ट्र सरकारने 12 लाख रुपयांचं बक्षीस देखील ठेवलं होतं (Gondia Police arrest most wanted Naxalite Ramesh Madavi in Chhattisgarh ).

रमेश मडावी 1998-99 मध्ये नक्षल दलममध्ये सहभागी झाला होता. यानंतर त्याने गोंदिया जिल्ह्यात अनेक मोठ्या नक्षली घटना घडवून आणल्या. देवरी नक्षल दलममध्ये त्याची वर्णी एसी. एम. एल. ओ. एस. कमांडर म्हणून देखील लागली होती. देवरी दलममध्ये असताना आरोपी रमेशने चिचगड पोलीस स्टेशन अंतर्गत येणाऱ्या मगरडोह हद्दीमध्ये पोलीस पथकावर प्राणघातक हल्ला केला होता.

या परिसरात नागरिकांच्या हत्या, गावकऱ्यांवर हल्ले करणे, सार्वजनिक मालमतेची नासधूस करणे अशा विविध घटनांमध्ये रमेश मडावी याचा सहभाग होता. त्याच्यावर याआधी देखील 13 गुन्हे दाखल आहेत. रमेश मडावी हा छत्तीसगड राज्यातील सुकमा जिल्ह्यात वावरत असल्याची गुप्त माहिती गोंदिया पोलिसांना मिळाली होती.

या माहितीच्या आधारे गोंदिया पोलिसांनी छत्तीसगड राज्यातील पोलिसांच्या सहकार्याने सुकमा जिल्ह्यात जाऊन रमेश मडावीला अटक केली. या अटकेला गोंदिया पोलिसांचं मोठं यश मानलं जात आहे. पोलीस उपाधीक्षक अतुल कुलकर्णी यांनी या कारवाईसाठी पोलीस दलाचे कौतुक केलं आहे.

संबंधित बातम्या : 

नक्षलवाद्यांनी ड्रोन किंवा काहीही वापरू द्या, आमच्याकडेही अत्याधुनिक शस्र, गृहमंत्र्यांचा इशारा

गडचिरोलीत पाच नक्षलवाद्यांचा खात्मा, एकनाथ शिंदेंकडून जवानांचं कौतुक

कोंबिंग ऑपरेशनदरम्यान सीआरपीएफवर नक्षलवादी हल्ला, 17 जवानांना वीरमरण

व्हिडीओ पाहा :

Gondia Police arrest most wanted Naxalite Ramesh Madavi in Chhattisgarh