धक्कादायक! पुण्यात पतीच्या संमतीनेच पत्नीवर बलात्कार

पुणे : पतीच्या संमतीनेच पत्नीवर बलात्कार केल्याचा धक्कादायक प्रकार पुण्यातील कात्रज परिसरात (rape on wife pune) घडला. याप्रकरणी 25 वर्षीय पीडित महिलेने भारती विद्यापीठ पोलीस ठाण्यात पतीविरोधात तक्रार दाखल केली. पोलिसांनी आरोपी आणि पीडितेच्या पती विरुद्ध गुन्हा दाखल केला आहे. आरोपींना अटक केली असून पोलीस अधिक चौकशी करत आहेत. विशेष म्हणजे ही घटना नोव्हेंबर 2019 मध्ये (rape on wife pune) घडली होती.

पीडित महिला आपल्या पतीसोबत हॉस्टेलवर कामाच्या निमित्ताने वास्तव्यास होती. या हॉस्टेलमधील सुरेश शिंदे याने महिलेच्या इच्छेविरुद्ध तिच्याशी जबरदस्तीने शारीरिक संबंध केला. ही बाब तिने आपल्या पतीला सांगितली. तेव्हा पतीने आपणच सुरेश शिंदेला तुझ्यासोबत शारीरिक संबंध ठेवण्यास सांगितले होते, असे उत्तर दिले होते.

पतीचे हे उत्तर ऐकून पीडितेला धक्का बसला. त्यानंतर पीडितेने आपल्या गावी परभणी येथे गुन्हा दाखल केला. परभणी पोलिसांनी पुढील तपासासाठी हा गुन्हा पुण्यातील भारती विद्यापीठ पोलिसांकडे वर्ग केला. भारती विद्यापीठ पोलिसांनी सुरेश शिंदे आणि तिच्या पतीविरुद्ध गुन्हा दाखल करुन शिंदे याला अटक केली आहे.