भाजपच्या विजय संकल्प बाईक रॅलीमध्ये मंत्र्यांची घोडेस्वारी

जालना : पंतप्रधान नरेंद्र मोदी यांना पुन्हा पंतप्रधान बनविण्यासाठी भाजपकडून विधानसभा स्तरावर विजय संकल्प बाईक रॅलीचं आयोजन करण्यात आलं. राज्यातील विविध भागांमध्ये भाजपचे नेते बाईकस्वारी करताना दिसून आले. यातच राज्याचे पाणीपुरवठा मंत्री बबनराव लोणीकरांनी बाईक नाही तर चक्क घोडेस्वारी केली. यावेळी घोडेस्वारी करताना त्यांनी मोदींच्या नावाने घोषणाही दिल्या. ‘हर हर मोदी, घर घर मोदी’ अशा घोषणा देत लोणीकरांनी घोडेस्वारी केली.

मुख्यमंत्र्यांनी स्वत: बाईक चालवली :

भाजपने आज आपलं शक्ती प्रदर्शन करत विजय संकल्प बाईक रॅलीचं आयोजन केलं. यामध्ये मुंबई, नाशिक, नागपूर, कोल्हापूर, हिंगोलीसह इतर शहरांमध्ये या बाईक रॅली काढण्यात आल्या. मुंबईमधील वांद्रे-वरळी सी लिंक टोल नाका ते वाकोलापर्यंत ही बाईक रॅला काढण्यात आली. यावेळी स्वत: मुख्यमंत्र्यांनी बाईक चालवली. मुख्यमत्र्यांसोबत मुंबई भाजप अध्यक्ष आमदार ॲड. आशिष शेलार या रॅलीमध्ये सहभागी झाले होते.

नाशिक बाईक रॅलीत मोदींच्या नावाच्या घोषणा :

नाशिक विधानसभा मतदार संघात नाशिकच्या एनडी पटेल रोड येथील भाजपच्या वसंत स्म्रुती कार्यालय येथून बाईक रॅली काढण्यात आली, या रॅलीमध्ये नाशिक विधानसभा मतदार संघातील सर्व भाजप नगरसेवक, पुरुष आणि महिला पदाधिकारी, आघाड्यांचे प्रमुख, सदस्य आणि कार्यकर्ते मोठ्या संख्येने संख्येने सहभागी झाले. यावेळी ‘देश का नेता कैसा हो नरेंद्र मोदी जैसा हो’, अशा घोषणाही देण्यात आल्या.

कोल्हापूरमध्येही बाईक रॅलीचा उत्साह :

कोल्हापूर उत्तर मतदार संघातील मुख्य मार्गावरुनही भाजपने ही बाईक रॅली काढली. यामध्ये भाजपच्या पुरुष कार्यकर्त्यांसोबतच महिला कार्यकर्त्यांनीही मोठ्या संख्येने हजेरी लावली. पश्चिम महाराष्ट्र देवस्थान समितीचे अध्यक्ष महेश जाधव, भाजपचे जिल्हाध्यक्ष संदीप देसाई यांच्यासह अनेक पदाधिकारी या रॅलीत सहभागी झाले. तर हिंगोलित या बाईक रॅलीमध्ये आमदार तान्हाजी मुटकुले, नगर अध्यक्ष बाबारावजी बांगर यांच्यासह अनेक मान्यवरांनी सहभाग दर्शवला.

अवघं नागपूर भाजपमय झालं : 

नागपुरातही वेगवेगळ्या मतदार संघात पाच बाईक रॅली काढत भाजपने शक्ती प्रदर्शन केलं. नागपूरच्या संविधान चौकातून एका रॅलीला सुरवात झाली, तर इतर प्रत्येक आमदाराच्या मतदार संघात रॅली काढण्यात आली. यात युवा मोर्चाचा मोठा पुढाकार होता. यामध्ये मोठ्या प्रमाणात भाजप कार्यकर्त्यांनी सहभाग घेतला होता. शहराच्या विविध भागात या रॅली निघाल्या असल्याने जिकडे तिकडे भाजपचे झेंडे पाहायला मिळत होते.