Maharashtra Monsoon | महाराष्ट्रात मान्सूनसाठी अनुकूल स्थिती, पुढील चार दिवस मुसळधार : हवामान विभाग

येत्या काही तासात गोवा, कोकण किनारपट्टीसह महाराष्ट्रात मान्सून दाखल होण्याची शक्यता हवामान विभागाने वर्तवली आहे. (Monsoon Hit Maharashtra Today)

Namrata Patil | Updated on: Jun 11, 2020 | 11:15 AM

पुणे : अरबी समुद्रात कमी दाबाचा पट्टा तयार झाला आहे. त्यामुळे महाराष्ट्रात मान्सूनसाठी लागणारे पोषक वातावरण तयार झाले आहे. त्यामुळे येत्या काही तासात गोवा, कोकण किनारपट्टीसह महाराष्ट्रात मान्सून दाखल होण्याची शक्यता हवामान विभागाने वर्तवली आहे. (Monsoon Hit Maharashtra Today)

हवामान विभागाने दिलेल्या माहितीनुसार, पुढील चार दिवस म्हणजे 11 ते 14 जून या चार दिवसात राज्यात सर्वत्र मुसळधार पावसाचा अंदाज वर्तवला जात आहे. गोवा, कोकण किनारपट्टी आणि महाराष्ट्राच्या काही भागात मान्सून दाखल होण्यास अनुकूल स्थिती निर्माण झाली आहे. त्यामुळे आज दुपारनंतर मान्सून कोकण किनारपट्टीवर दाखल होईल, अशी शक्यता वर्तवली जात आहे.

महाराष्ट्रात मान्सून दाखल होण्यापूर्वी मुंबईत काही ठिकाणी पावसाची रिपरिप पाहायला मिळाली. मुंबईतील दादर, मांटुंगा, कुलाबा, मालाड, कांदिवली या ठिकाणी पावसाने हजेरी लावली.

मुंबईसह नांदेड, हिंगोली या ठिकाणीही दमदार पाऊस झाला. नांदेडमध्ये गेल्या काही दिवसांपासून तापमानाचा पारा 45 अंश सेल्सिअस इतका पाहायला मिळत होता. मध्यरात्रीपासून कोसळणाऱ्या पावसामुळे तापमान 35 अंशावर घसरले. यामुळे उकाड्याने हैराण झालेल्या नागरिकांना दिलासा मिळाला आहे.

तर दुसरीकडे हिंगोली परिसरात रात्री झालेल्या जोरदार पावसामुळे पर्यायी पुलाचा काही भाग वाहून गेला. वसमत तालुक्यातील कुरुंदा गावाजवळील जलेश्वर नदीवरील पर्यायी पूलाचा काही भाग वाहून गेला आहे. त्यामुळे कुरुंदा गावाकडून टोकाई गडाकडे जाण्याचा मार्ग बंद झाला (Monsoon Hit Maharashtra Today) आहे.