सलमानचा मदतीचा ओघ सुरुच, 25 हजार बॅकस्टेज कामगारांच्या खात्यात प्रत्येकी 3 हजार जमा

मुंबई : प्रसिद्ध बॉलिवूड अभिनेता सलमान खान कोरोना संसर्ग आणि त्या पार्श्वभूमीवर लागू लॉकडाऊनमुळे अडचणीत सापडलेल्या सिनेवर्कर्स/बॅकस्टेज कामगारांच्या मदतीला धावून आला आहे (Salman Khan helps back stage artist amid Lockdown). सलमानने चित्रपट इंडस्ट्रीतील 25 हजार सिनेवर्कर्स/बॅकस्टेज कामगारांच्या खात्यात प्रत्येकी 3 हजार रुपये जमा केली आहे. तसेच ही परिस्थिती सुरळीत होऊपर्यंत पुढील 3 महिने सलमान या कामागारांना प्रति महिना 3 हजार रुपयांची मदत करणार आहे.

सलमान खानने आतापर्यंत कोरोना विरुद्धच्या लढाईत एकूण 22 कोटी 50 लाखांची मदत केली आहे. कोरोना विषाणूंचा प्रादुर्भाव वाढू नये म्हणून देशात 21 दिवसांचं लॉकडाऊन घोषित करण्यात आलं आहे. लॉकडाऊनमुळे सर्व चित्रपट आणि मालिकांचेही चित्रिकरण बंद पडलं आहे. त्यामुळे या क्षेत्रात काम करणाऱ्या हजारो मजुरांचं मोठं नुकसान झालं आहे. या क्षेत्रातील हजारो मजुरांचं हातावर पोट आहे. त्यामुळे अशा कामगारांना मदतीची नितांत गरज होती. हेच लक्षात घेऊन घेऊन सलमान खान पुढे सरसावला आहे. याआधीच सलमान खानने सिनेसृष्टीतील कामगारांसाठी दोन महिन्यात 10 कोटी 50 लाख रुपयांची मदत करणार असल्याचं जाहीर केलं होतं. ही मदत तो दोन टप्प्यांमध्ये करत आहे. त्यातील पहिल्या टप्प्याची मदत त्याने आधीच केली होती. आता दुसऱ्या टप्प्यात त्याने 5 कोटी 70 लाखांची मदत केली.

सलमान खान फिल्म प्रोडक्शनने फेडरेशन ऑफ वेर्स्टन इंडिया सिने इम्प्लॉयीजचे सचिव अशोक दुबे यांच्याजवळ चित्रपटसृष्टीत काम करणाऱ्या मजुरांचे बँक अकाउंट नंबर मागितले होते. त्या माहितीच्या आधारेच सलमानने संबंधित कामगारांच्या खात्यात थेट पैसे हस्तांतरित केले. या मदतीमुळे संबंधित कामगारांना मोठा दिलासा मिळणार आहे. या व्यतिरिक्त सलमान विविध संस्थासोबत मिळून गरजू लोकांना 3 महिने धान्य आणि जेवण पुरवण्यासाठी देखील पुढे आला आहे.

सलमानच्या घरातून पोस्ट प्रोडक्शनचं काम सुरु

कोरोना विषाणूमुळे ‘राधे’ सिनेमाची शूटिंग बंद आहे. मात्र, या सिनेमाच्या पोस्ट प्रोडक्शनचं काम सलमानच्या घरुन सुरु होतं. लॉकडाऊनची घोषणा होताच, सलमानने त्याच्या पनवेल येथील फार्म हाऊसवर या सिनेमाच्या पोस्ट प्रोडक्शनच्या कामाला सुरुवात केली होती. या सिनेमाचे दिग्दर्शक प्रभू देवा असून ते चेन्नई येथून सिनेमाच्या पोस्ट प्रोडक्शनचं काम पाहात आहेत. ‘राधे’ सिनेमात सलमान आणि अभिनेत्री दिशा पटाणी सोबत काम करताना दिसणार आहे.

संबंधित बातम्या  :

Lockdown : सलमानची दानत, शूट थांबलं तरीही ‘राधे’च्या क्रू मेंबर्सना पगार

स्पॉट बॉय ते फिल्म लाईन कामगार, 16 हजार कामगारांच्या खात्यात सलमानकडून थेट मदत जमा

सलमान खान पनवेलच्या फार्म हाऊसवर, घोड्यासोबत विरंगुळा, मुंबईकरांना मोलाचा सल्ला

Salman Khan help to back stage artist amid Lockdown