चार वर्षांच्या अफेअरनंतर विवाह, तीन दिवसात पतीची ट्रेनखाली उडी, पत्नीचाही गळफास

लखनौ : लग्नानंतर अवघ्या काही दिवसातच नवविवाहित दाम्पत्याने एकामागून एक आत्महत्या केल्याचा प्रकार उत्तर प्रदेशमध्ये उघडकीस आला आहे. नवऱ्याने आधी ट्रेनखाली उडी मारुन जीव दिला, तर जबर मानसिक धक्का बसलेल्या पत्नीनेही दुसऱ्याच दिवशी गळफास घेऊन जीवनयात्रा संपवली. (Uttar Pradesh Ghaziabad Newly Married Couple commits Suicide)

गाझियाबाद जिल्ह्यात राहणाऱ्या विशाल प्रजापती आणि निशा गौतम यांचे चार वर्षांपासून प्रेमसंबंध होते. दोन्ही कुटुंबाच्या संमतीने दोघे 29 जून रोजी विवाहबंधनात अडकले, अशी माहिती एका पोलिस अधिकाऱ्याने दिली.

पती विशाल गाझियाबादमधील गोविंदापुरम भागात कोचिंग सेंटरमध्ये कॉमर्स क्लास घ्यायचा. तर निशा एका मल्टीनॅशनल कंपनीत एचआर मॅनेजर म्हणून काम करायची.

विशाल गुरुवारी घरातील कोणालाच न सांगता एकाएकी बेपत्ता झाला. तो हरवल्याची तक्रार कुटुंबीयांनी संध्याकाळी पोलिसात दिली. वारंवार फोन करुनही तो उचलत नसल्याने प्रजापती कुटुंब घाबरेघुबरे झाले होते. रात्री एका तरुणाचा मृतदेह रेल्वे रुळांजवळ सापडला, त्याची ओळख पटवली असता तो विशालचा असल्याचे समोर आले. मेहरौली रेल्वे क्रॉसिंगवर धावत्या ट्रेनसमोर उडी मारुन त्याने आयुष्य संपवलं, अशी माहिती पोलिसांनी दिली.

हेही वाचा : बायकोची आत्महत्या, अंत्यसंस्कारावेळी नवऱ्याचीही चितेत उडी, वाचवलेल्या नवऱ्याने पुन्हा विहिरीत जीव दिला

दुसर्‍या दिवशी निशाला तिच्या आई-वडिलांनी सासरहून कवी नगरमधील कैलाश पुरी कॉलनीत असलेल्या माहेरी नेले. आई-वडिलांनी तिचे सांत्वन करण्याचा प्रयत्न केला, परंतु रात्रीच तिने स्वतःच्या खोलीत पंख्याला गळफास घेऊन आत्महत्या केली.

या घटनेची माहिती मिळताच पोलिस घटनास्थळी दाखल झाले. दोन्ही मृतदेह शवविच्छेदनासाठी पाठवण्यात आले असून पोलीस अधिक तपास करत आहेत. विशाल-निशाचा असा करुण अंत झाल्याने सर्वत्र हळहळ व्यक्त केली जात आहे.

हेही पहा :

VIDEO : Unlock 2.0 | मुख्यमंत्र्यांची हॉटेलचालकांसोबत बैठक, हॉटेल्स सुरु करण्याबाबात लवकरच निर्णय https://t.co/c4E6zDmBEh

— TV9 Marathi (@TV9Marathi) July 5, 2020

(Uttar Pradesh Ghaziabad Newly Married Couple commits Suicide)