शेजारच्या महिलेला मम्मा म्हटल्याने राग अनावर, आईने ओलांडली क्रूरतेची सीमा; वाचून तुमच्याही अंगावर येईल काटा

माणुसकीला आणि मातृत्वाला काळिमा फासणारी एक अत्यंत धक्कादायक आणि अमानुष घटनेने महाराष्ट्र हादरला आहे. अवघ्या तीन वर्षांच्या निष्पाप दत्तक मुलीने शेजारील एका महिलेला मम्मा अशी हाक मारली, याचा राग मनात धरून तिच्या सावत्र आईने क्रूरतेचा कळस गाठला. या क्षुल्लक कारणावरून संतापलेल्या सावत्र आईने चिमुरडीला घरात कोंडून तिच्या डोळ्यात आणि तोंडात तिखट मिरची पावडर टाकली आणि तिला बेदम मारहाण केली. भिवंडी तालुक्यातील पडघा जवळ असलेल्या बापगाव येथे ही धक्कादायक घटना उघडकीस आली आहे. या अमानुष कृत्यामुळे परिसरात मोठी खळबळ उडाली असून, या घटनेने मुलांच्या सुरक्षेचा प्रश्न पुन्हा एकदा ऐरणीवर आला आहे.

नेमकं काय घडलं?

मिळालेल्या माहितीनुसार, भिवंडीच्या बापगाव येथील रहिवासी दिलशान शेख हिने एका तीन वर्षांच्या मुलीला दत्तक घेतले होते. ही मुलगी त्यांच्यासोबतच राहत होती. काही दिवसांपूर्वी या चिमुरडीने शेजारी राहणाऱ्या एका महिलेला प्रेमाने मम्मा अशी हाक मारली. ही गोष्ट दिलशान शेख हिला सहन झाली नाही. या क्षुल्लक कारणावरून संतापलेल्या दिलशानने चिमुरडीला घरात कोंडले. यानंतर तिच्या डोळ्यात आणि तोंडात तिखट मिरची पावडर टाकून तिला बेदम मारहाण केली.

या अमानुष कृत्याचा एक व्हिडीओ सोशल मीडियावर व्हायरल झाला आहे. यामध्ये आरोपी महिलेचा पती तिला हे कृत्य करण्यापासून थांबवताना दिसत आहे. मात्र तरीही ती महिला चिमुरडीवर अत्याचार करत राहिली. हा व्हिडीओ समोर आल्यानंतर परिसरात तीव्र संताप व्यक्त होत असून पोलिसांनी तातडीने सूत्रे हलवली. या प्रकरणी पडघा पोलिसांनी मुख्य आरोपी सावत्र आई दिलशान शेख, तिचा पती शौकत समसूद्दीन शेख आणि मुलीला दत्तक देणारा उमेश येवले या तिघांविरोधात विविध कलमान्वये गुन्हा दाखल केला आहे. उमेश येवले याने नेमक्या कोणत्या परिस्थितीत आणि कायदेशीर प्रक्रिया पूर्ण केली होती का, याचाही तपास पोलीस करत आहेत.

याप्रकरणी पोलिसांनी तातडीने कारवाई करत पीडित चिमुरडीची या क्रूर महिलेच्या तावडीतून सुटका केली आहे. सध्या या निष्पाप मुलीला पुढील सुरक्षिततेसाठी आणि उपचारांसाठी बाल निरीक्षणगृहात पाठवण्यात आले आहे. या घटनेमुळे पालकांच्या भूमिकेवर आणि दत्तक प्रक्रियेच्या सुरक्षेवर मोठे प्रश्नचिन्ह उभे राहिले आहे.