बड्या नेत्याचा मनसेला जय महाराष्ट्र; राज ठाकरेंच्या मुंबईतील सभेपूर्वीच भाजपात मोठा पक्षप्रवेश
राजकीय वर्तुळातून मोठी बातमी समोर येत आहे. महापालिका निवडणुकीची धामधुम सुरू असतानाच मनसेला मोठा धक्का बसला आहे, बड्या नेत्यानं भाजपात प्रवेश केला आहे.
राज्यात महापालिका निवडणुकीची रणधुमाळी सुरू आहे, प्रचाराला देखील वेग आला आहे. आज मुंबईमध्ये मनसे प्रमुख राज ठाकरे आणि शिवसेना ठाकरे गटाचे प्रमुख उद्धव ठाकरे यांची सभा होणार आहे. तब्बल वीस वर्षांनंतर दोन्ही ठाकरे बंधू एकत्र आले आहेत. मुंबई महापालिकेसह इतर काही महापालिका निवडणुकीसाठी मनसे आणि शिवसेना ठाकरे गटाची युती झाली आहे. त्यामुळे आज राज ठाकरे आणि उद्धव ठाकरे हे काय बोलणार याकडे सर्व राज्याचं लक्ष लागलं आहे. तर दुसरीकडे मात्र या सभेपूर्वीच राज ठाकरे यांना आणखी एक धक्का बसला आहे, आणखी एका नेत्यानं राज ठाकरे यांची साथ सोडली आहे.
मुंबई महापालिका निवडणुकीसाठी शिवसेना ठाकरे गटासोबत मनसेनं युती केली. मात्र या युतीनंतर मनसेला धक्क्यावर धक्के बसत असल्याचं पहायला मिळत आहे. अनेक नेत्यांनी मनसेची साथ सोडली आहे, आता आणखी एका नेत्यानं भाजपात प्रवेश केला आहे. मनसेचे शहराध्यक्ष मनोज घरत यांनी भाजपमध्ये प्रवेश केला आहे. मनोज घरत यांनी भाजपचे उमेदवार महेश पाटील यांच्या विरोधात मनसेमधून भरलेला उमेदवारी अर्ज मागे घेतला होता, त्यानंतर ते भाजपमध्ये प्रवेश करणार असल्याची चर्चा सुरू होती, अखेर त्यांनी आता भाजपात प्रवेश केला आहे. आज डोंबिवलीमधील गोपी चौक परिसरात भाजपचे प्रदेशाध्यक्ष रवींद्र चव्हाण यांच्या उपस्थितीत त्यांनी भाजपमध्ये पक्षप्रवेश केला. हा महापालिका निवडणुकीपूर्वी मनसेसाठी मोठा धक्का मानला जात आहे.
मनसे, शिवसेना ठाकरे गट युती
दरम्यान यावेळी राज्याच्या राजकारणात एक नवा प्रयोग पहायला मिळत आहे, तब्बल वीस वर्षानंतर दोन्ही ठाकरे बंधू महापालिका निवडणुकांसाठी एकत्र आले आहेत. मनसेनं शिवसेना ठाकरे गटासोबत युती केली आहे. या युतीमध्ये मुंबई महापालिका निवडणुकीसाठी राष्ट्रवादी शरद पवार गटाचा देखील सहभाग आहे. त्यामुळे यावेळी मुंबईत महायुतीपुढे दोन्ही ठाकरे बंधूंच तगडं आव्हान असणार आहे. मुंबईमध्ये भाजपनं शिवसेना शिंदे गटासोबत युती केली आहे.
