Chhagan Bhujbal: काळजाचा ठोका वाढवणारी बातमी! पेट्रोल-डिझेलचा साठा फक्त… भुजबळांनी चिंता वाढवली

सध्या जागतिक पातळीवर सुरू असलेल्या घडामोडींमुळे इंधन पुरवठ्यावर मोठा परिणाम झाला असून, त्याचे सावट आता आपल्यावरही दिसू लागले आहे. राज्याचे अन्न व नागरी पुरवठा मंत्री छगन भुजबळ यांनी इंधन साठ्याबाबत अत्यंत महत्त्वाची आणि चिंता वाढवणारी माहिती दिली आहे. त्यांनी आपल्या देशाकडे पेट्रोल आणि डिझेलचा किती साठा शिल्लक राहिली आहे याची माहिती दिली आहे. ते नेमकं काय म्हणाले वाचा…

“आमच्याकडे सध्या केवळ १ महिना पुरेल इतकाच पेट्रोल आणि डिझेलचा साठा उपलब्ध आहे,” असा खळबळजनक खुलासा भुजबळांनी केला आहे. त्यामुळे आगामी काळात इंधनाची मोठी टंचाई निर्माण होणार का, अशी भीती आता नागरिकांमध्ये पसरली आहे.

केरोसीनचा साठा मुबलक, पण साखळी तुटली!

पेट्रोल-डिझेलची चिंता असली तरी राज्याकडे केरोसीनचा (घासलेट) साठा मात्र भरपूर प्रमाणात उपलब्ध आहे. परंतु, केरोसीन वाटपाची जी साखळी (सप्लाय चेन) होती, ती सध्या पूर्णपणे तुटली आहे. ही परिस्थिती हाताळण्यासाठी आणि वाटप सुरळीत करण्यासाठी काही विशेष अधिकाऱ्यांची नियुक्ती करण्यात आली आहे. तसेच ही साखळी पूर्ववत करण्यासाठी आता केरोसीन वाटपाची विनामूल्य परवानगी दिली जाईल, असेही भुजबळांनी स्पष्ट केले आहे.

जागतिक युद्धाची झळ; पण भारताची स्थिती उत्तम

हा प्रश्न केवळ मुंबई, महाराष्ट्र किंवा भारतापुरता मर्यादित नसून तो एक जागतिक प्रश्न बनला आहे. इराण, अमेरिका आणि इतर देशांमध्ये सुरू असलेल्या अंतर्गत वाद आणि राजकीय घडामोडींमुळे जगभरात होणारा इंधन पुरवठा विस्कळीत झाला आहे. याचा फटका युरोपपासून जपानपर्यंत आणि अगदी अमेरिकेसारख्या महासत्तेलाही बसला असून तिथेही पेट्रोल-डिझेलचे भाव गगनाला भिडले आहेत.

या संपूर्ण पार्श्वभूमीवर पंतप्रधान नरेंद्र मोदी हे सातत्याने प्रयत्नशील आहेत. इंधनाची आवक सुरळीत सुरू राहण्यासाठी त्यांनी अनेक नवीन देशांशी संपर्क साधून चर्चा सुरू केली आहे. जागतिक संकट मोठे असल्याने आपल्यालाही थोडी अडचण सहन करावी लागू शकते, परंतु इतर देशांच्या तुलनेत आजतरी आपल्या भारताची परिस्थिती अतिशय चांगली आणि नियंत्रणात आहे, असा दिलासाही त्यांनी दिला.

३० जूनच्या आत अर्ज करा, अन्यथा एलपीजी सिलेंडर बंद!

इंधन साठ्यासोबतच छगन भुजबळ यांनी पीएनजी (PNG) गॅस पाइपलाइनबाबत नागरिकांना कडक इशारा दिला आहे. ज्या ज्या भागात गॅस पाइपलाइनचे काम पूर्ण झाले आहे किंवा कंपन्या पाईपलाईन जोडणीचे काम करत आहेत, तिथल्या नागरिकांनी ३० जूनच्या आधी जोडणीसाठी अर्ज करणे बंधनकारक आहे.