धाराशिव हादरलं! गॅस एजन्सी धारकाचा टोकाचा निर्णय; विष पिऊन जीव देण्याचा प्रयत्न
Dharashiv News : धाराशिवमधून एक धक्कादायक घटना समोर आली आहे. एका गॅस एजन्सी धारकाने आत्महत्येचा प्रयत्न केला आहे. या डीलरने हे टोकाचे पाऊल का उचलले? याबाबत सविस्तर माहिती जाणून घेऊयात.
इराण आणि अमेरिका यांच्यातील युद्धामुळे जगभरातील कच्च्या तेलाच्या पुरवठ्यावर परिणाम झाला आहे. भारतातही नैसर्गिक वायुची कमतरता जाणवत आहे. त्यामुळे सरकारने LPG वितरणावर निर्बंध लादले आहेत. व्यावसायिक गॅसचा पुरवठा मर्यादित करण्यात आला आहे. तसेच घरगुती गॅसता पुरवठा सुरळित राहण्यासाठी महत्त्वाच्या उपाय योजना लागू केल्या जात आहेत. असं असलं तरी अनेक गॅस एजन्सीच्या समोर लांबच लांब रांगा पहायला मिळत आहेत. अशातच आता धाराशिवमधून एक धक्कादायक घटना संमोर आली आहे. एका गॅस एजन्सी धारकाने आत्महत्येचा प्रयत्न केला आहे. याबाबत सविस्तर माहिती जाणून घेऊयात.
गॅस एजन्सी धारकाचा आत्महत्येचा प्रयत्न
धाराशिव जिल्ह्यातील काटी सावरगावातील एका गॅस एजन्सी धारकाने आत्महत्येचा प्रयत्न केल्याची घटना समोर आली आहे. कंपनीसोबत सर्व डीलर्सची व्हिसी सुरू असताना त्याने विष पिऊन आत्महत्येचा प्रयत्न केला आहे. त्यानंतर सोलापूर, धाराशिव जिल्ह्यातील सर्व डीलर्ससोबत प्रशासनाने बैठक बोलावली होती. यात सर्व डीलर्सनी अडचणी सांगितल्या असच्याची माहिती एचपी डीलर्स असोसिएशनचे अध्यक्ष संजय स्वामी यांनी दिली आहे.
आम्हाला कंपनीचा त्रास नसून ग्राहकांचा मोठा ताण आहे – संजय स्वामी
एचपी डीलर्स असोसिएशनचे अध्यक्ष संजय स्वामी यांनी म्हटले की, ‘आत्ताच आमची बैठक पार पडली त्यात आम्ही आमच्या अडचणी सांगितल्या. आमच्या एका डीलरने आज आत्महत्येचा प्रयत्न केला त्याचे आम्ही समर्थन करत नाही. त्यांच्या कुटूंबीयांची आम्ही भेट घेतली आणि त्यांना आत्मविश्वास देण्याचा प्रयत्न केला. मुळात आम्हाला कंपनीचा त्रास नसून ग्राहकांचा मोठा ताण आहे. लोकं आमच्या एजन्सीबाहेर मोठ्या रांगा लावून बसत आहेत.’
गॅसचा मुबलक साठा आहे – संजय स्वामी
पुढे बोलताना संजय स्वामी यांनी म्हटले की, ‘अनेक ग्राहकांचे केवायसी होत नसल्याने नागरिक आम्हाला जाब विचारत आहेत. आज दिवसभर कंपनीची साईट बंद पडल्याने ग्राहकांकडून आमच्यावर दबाव टाकला जात आहे. त्यातून हा प्रकार घडला आहे. ग्राहकांना आवाहन आहे की तुम्ही आमच्यावर प्रेशर टाकू नका, गॅसचा मुबलक साठा आहे.’
