ठरलं! राज्यात उद्या दुष्काळ जाहीर होणार, शेतकऱ्यांना काय काय मिळणार? देवेंद्र फडणवीसांचा मेगा प्लॅन समोर

मोठी बातमी समोर येत आहे. शुक्रवारी दुष्काळासंदर्भात जीआर काढला जाणार आहे. मुख्यमंत्री देवेंद्र फडणवीस यांनी याबाबत माहिती दिली आहे. सध्या फडणवीस हे अमरावतीच्या दौऱ्यावर आहेत. अमरावती विमानतळावर माध्यमांशी संवाद साधताना त्यांनी याबाबत माहिती दिली आहे. पिकांची परिस्थिती अतिशय खराब आहे. विशेष: सोयाबीन असेल, काही भागातील कापूस असेल उडीद असेल, तूर असेल सगळ्या पिकांवर आपल्याला या ठिकाणी संकट पहायला मिळत आहे. म्हणूनच हा दौरा करून शेतकऱ्यांना कशा प्रकारे मदत करता येईल, हा आमचा प्रयत्न आहे. आपली दुष्काळाची जी संहिता आहे, त्या संहितानुसार ट्रिगर वन प्रमाणे दुष्काळ जाहीर करण्याचा जो काही शासन आदेश आहे, तो आदेश आम्ही काढणार आहोत, असं यावेळी देवेंद्र फडणवीस यांनी म्हटलं आहे.

कदाचित त्यामध्ये एखादा दुष्काळी भाग सुटला तर ट्रिगर थ्री प्रमाणे आम्ही त्या भागाचा समावेश करू, पण सकृतदर्शनी राज्यात मोठ्या प्रमाणात दुष्काळ दिसून येत आहे, असा सर्व भाग जिथे दुष्काळ दिसत आहे, त्या सर्व भागाचा समावेश आम्ही यामध्ये करणार आहोत. शेतकऱ्यांना आपल्याला वेगवेगळी मदत करावी लागणार आहे. विशेष: चाऱ्याची टंचाई, पाण्याची टंचाई या संदर्भांत आपण कार्यवाही करणार आहोत, असंही यावेळी फडणवीस यांनी म्हटलं आहे.

दरम्यान कुठेही अन्नधान्याची कमतरता पडू नये यासाठी आपण मदत करणार आहोत. शेतकऱ्यांना जी थेट मदत करायची आहे, हेक्टरी ती देखील आम्ही त्यांना करणार आहोत. शेतकऱ्यांच्या मुलांच्या शिक्षणामध्ये खंड पडू नये, यासाठी देखील आम्ही उपाययोजना करणार आहोत. या सर्व उपाययोजना करत असताना ज्या भागात पाणी उपलब्ध होईल, अशा भागात रब्बीचा पेरा करता येईल, त्यासाठी देखील आम्ही मदत करणार आहोत. सध्या राज्यात गंभीर परिस्थिती निर्माण झाली आहे, या परिस्थितीमध्ये जास्तीत जास्त काम काढून रोजगार उपलब्ध करून देण्याचा सरकारचा प्रयत्न असेल असंही यावेळी फडणवीस यांनी म्हटलं आहे.