मुलीच्या हत्येबद्दल बापलेकाला अटक आणि 20 दिवसांनी मुलगी स्वत: पोलिसांकडे हजर, अजब प्रकाराने पोलीस चक्रावले !

२० दिवसापूर्वी जळगाव जामोद तालुक्यातील राजुरा धरण परिसरात एका महिलेचा अर्धवट जळालेला मृतदेह आढळला होता. मृतदेहापासून काही फुटावर महिलेचे शिरही आढळलं होतं.या प्रकरणी तात्काळ माहिती मिळाल्यावर जळगाव जामोद पोलिसांनी घटनास्थळी भेट दिली आणि फॉरेन्सिक विभागाची टीम बोलावून या सर्व प्रकरणाचा तपास केला. विशेष म्हणजे अप्पर पोलीस अधिक्षक श्रेणिक लोढा यांनी या प्रकरणात मार्गदर्शन करून या प्रकरणाचा छडा लावल्याचा दावा केला होता.या मुलीच्या हत्येच्या प्रकरणात बापलेकांना पोलिसांनी अटकही केली. मात्र, २० दिवसांनी मुलगी स्वत: पोलिसाकडे हजर झाली. आता अर्धवट जळालेला मृतदेह कोणत्या महिलेचा असा सवाल निर्माण झाला आहे.

बुलढाणा पोलिसांचा निष्काळजीपणाचा एक अजब नमुना समोर आला आहे. मध्य प्रदेशातील एका गावातील शिवानी बापूराव कळमेकर हिचा अनैतिक संबंधातून खून करण्यात आला होता. शिवानी हीचे तिच्या प्रियकराशी अनैतिक संबंध होते.आणि ती विवाहित असून देखील प्रियकराला भेटत असल्याने तिची हत्या करण्यात आल्याचा पोलिसांचा आरोप होता. शिवानी हिची हत्या करुन तिचा मृतदेह महाराष्ट्रातील जळगाव जामोद पोलीस स्टेशनच्या हद्दीतील राजुरा धरणात जवळ आणून टाकला होता.अशी उकल जळगावच्या जामोद पोलिसांनी केली होती.

शिवानी कळमेकर जीवंत

याप्रकरणी मुलीची हत्या केल्याचा आरोप ठेवत बुलढाणा पोलिसांनी शिवानी कळमेकर हीचे वडील बापूराव कळमेकर तसेच तिच्या भावाला अटक केली. हे बापलेक आता दोघेही जेलमध्ये आहे. मात्र शिवानी कळमेकर जीवंत असून तिने आज तिच्या प्रियकरासोबत आज बुऱ्हानपूर पोलीस स्टेशन गाठत थेट आपण जीवंत असून माझ्या हत्याच्या गुन्ह्यात माझ्या वडिलांना आणि भावाला जळगाव जामोद पोलिसांनी जेलमध्ये ठेवले असल्याचा कबुली जबाब दिला असल्याच्या माहिती उघड झाल्याने खळबळ उडाली आहे.

जामोद पोलिसांचा मोठा निष्काळजीपणा ?

काही वेळापूर्वीच शिवानी कळमेकर ही जळगाव जामोद पोलीस स्टेशनमध्ये दाखल झाली असून स्थानिक जळगाव जामोद पोलीस तिचा जबाब घेत आहेत. मात्र बुलढाणा पोलिसांनी जळगाव जामोद येथे सापडलेल्या मृतदेहाचा डीएनए तपासणी न करता शिवानी कळमेकर हिच्या वडिल आणि भावावर गुन्हा दाखल करून त्यांना जेलमध्ये टाकल्याचा आरोप होत आहे. त्यामुळे या प्रकरणात बुलढाणा आणि जळगाव जामोद पोलिसांचा मोठा निष्काळजीपणा समोर आला आहे. मात्र ज्या महिलेचा मृतदेह सापडला होता, ती नेमकी कोण ? हा प्रश्न आता उपस्थित झाला आहे. तर बुलढाणा पोलीस या घटनेबद्दल बोलायला सध्या तरी तयार नाहीत अशी स्थिती आहे.