अजित दादांनी याला कुत्र्याची उपमा दिलेली, त्यामुळे आम्हाला…सुप्रिया सुळेंच्या विषयावरुन उमेश पाटलांवर सडकून टीका
"स्वतः अजित दादांनी याला कुत्र्याची उपमा दिली होती, त्यामुळे आम्हाला बोलायला लावू नका. मोहोळ मध्ये तुमचं काय काय आहे, त्याबद्दल तोंड उघडायला लावू नका. त्यामुळे मित्र म्हणून सल्ला देतो"
सोलापूरमधील मोहोळचे माजी आमदार रमेश कदम यांनी राष्ट्रवादी काँग्रेसचे अजितदादा गटाचे नेते उमेश पाटील यांच्यावर सडकून टीका केली आहे. राष्ट्रवादीच्या खासदार सुप्रिया सुळे यांच्यावर उमेश पाटील यांनी टीका केली होती. “उमेश पाटील यांनी स्वतःची राजकीय लायकी आणि राजकारणातली पातळी ओळखली पाहिजे. आपण कोणत्या नेत्याला प्रत्युत्तर देतो हे पाहिले पाहिजे. हा उमेश पाटील जिल्हा परिषदेची निवडणूक देखील जिंकू शकला नाही. राजकारणात क्रेडिबिलीटी नसलेला, पॉलिटिकल मॅच्युरिटी नसलेला आणि कॅमेराजीवी असा उमेश पाटील आहे” अशा शब्दात रमेश कदम यांनी उमेश पाटील यांच्यावर हल्लाबोल केला.
“स्वतः अजित दादांनी याला कुत्र्याची उपमा दिली होती, त्यामुळे आम्हाला बोलायला लावू नका. मोहोळ मध्ये तुमचं काय काय आहे, त्याबद्दल तोंड उघडायला लावू नका. त्यामुळे मित्र म्हणून सल्ला देतो. वैचारिक आणि राजकीय मतभेद असू शकतात. मात्र केवळ प्रसिद्धीच्या हव्यासापोटी अशी वक्तव्य करू नये. ज्या भाषेत तुम्ही टीका कराल त्या भाषेत आम्ही उत्तर दिल्याशिवाय राहणार नाही” असं रमेश कदम म्हणाले.
एवढा मोठा दु:खाचा डोंगर कोसळलेला
काही दिवसांपूर्वी उमेश पाटील यांनी राष्ट्रवादी काँग्रेसमधील अंतर्गत घडामोडींबद्दल मोठं भाष्य केलं होतं. “दादांच्या मृत्यूनंतर, अपघात झाल्यानंतर दुसऱ्यादिवशी अंत्यविधी झाला. दादांना मृताग्नी देण्याआधी काही लोकांनी शपथविधीची तयारी चालू केलेली. हा मंत्री होणार, तो केंद्रात जाणार, कुठे आहे दु:ख. त्या परिवारावर एवढा मोठा दु:खाचा डोंगर कोसळलेला असताना त्यांना आधार, सांत्वनाची गरज असताना राजकीय आडाखे बांधत होती काही लोकं” असा गौप्यस्फोट उमेश पाटील यांनी केला होता.
“उमेश पाटील कोणाच्या बापाला घाबरत नाही. उमेश पाटील अजितदादांचा कार्यकर्ता आहे. दादा जसे निडर होते, तसाच उमेश पाटील आहे. उलट दोन पावलं पुढे आहे” असं उमेश पाटील बोललेले.
