नीट पेपरफुटी प्रकरणात सीबीयाचं पथक लातूरमध्ये आलं अन् लिफ्टमध्ये अडकलं, नेमकं काय घडलं?

मेडिकल क्षेत्रामध्ये प्रवेशासाठी नीट परीक्षा ही अत्यंत महत्त्वाची आहे. परंतु या परीक्षेला आता पेपरफुटीचं ग्रहण लागलं आहे. नीट परीक्षेचा पेपर लीक झाल्याची माहिती काही दिवसांपूर्वी समोर आली होती. या घटनेमुळे संपूर्ण देशभरात मोठा गोंधळ निर्माण झाला होता. संतापाचं वातावरण पहायला मिळालं, नीटचा पेपर फुटल्याचं समोर आल्यानं अखेर सरकारने ही परीक्षा रद्द केली. या प्रकरणाचा तपास सीबीआयकडे सोपवण्यात आला आहे. दरम्यान या प्रकरणात आतापर्यंत सीबीआयने काही जणांना अटक केलं असून, त्यांच्या चौकशीमधून धक्कादायक खुलासे समोर येत आहेत.

नीट पेपर फुटी प्रकरणात आता लातूरमधून मोठी बातमी समोर आली आहे, ती म्हणजे या प्रकरणात पहिल्यांदाच सीबीआयने पालकावर कारवाई केली आहे.  डॉ. मनोज शिरुरे यांना अटक करण्यात आली आहे, त्यांना लातूरमधून अटक करण्यात आली. लातूरमधून ही तिसरी अटक आहे. डॉ. मनोज शिरुरे हे बालरोग तज्ज्ञ असून, ते यापूर्वी याच प्रकरणात अटक झालेल्या पी व्ही कुलकर्णी आणि मोटेगावकर यांच्या संपर्कात असल्याचं समोर आलं आहे.

दरम्यान डॉ. मनोज शिरुरे यांना अटक केल्यानंतर आता सीबीआयकडून लातूरमधील मनोज शिरुरे यांच्या घरी, हॉस्पिटलमध्ये आणि बाजूच्या अपार्टमेंटमध्ये देखील चौकशी करण्यात आली.  याचदरम्यान एक धक्कादायक प्रकार घडला तो म्हणजे मनोज शिरुरे यांच्या घराशेजारी असलेल्या मयुरेश्वर अपार्टमेंटमध्ये चौकशीसाठी जात असताना सीबीआय पथक लिफ्टमध्ये अडकल्याची घटना घडली, मध्येच विद्युत पुरवठा खंडित झाल्यामुळे सीबीआय पथक लिफ्टमध्ये अडकलं, त्यानंतर थोड्याच वेळात त्यांची लिफ्टमधून सुटका करण्यात आली.    दरम्यान दुसरीकडे अंबाजोगाई येथील दोन विद्यार्थ्यांची देखील सीबीआयकडून चौकशी करण्यात आली. चौकशीनंतर या विद्यार्थ्यांना सीबीआयने सोबत घेतल्याची माहिती समोर येत आहे.

कोण आहे मनोज शिरुरे?  

या प्रकरणात पहिल्यांदाच सीबीआयने पालकावर कारवाई केली आहे.  डॉ. मनोज शिरुरे यांना पोलिसांनी अटक केली आहे. मनोज शिरुरे हे कुलकर्णी आणि मोटेगावकर यांच्या संर्पकात होते, अशी माहिती समोर येत आहे. मनोज शिरुरे याने मोटेगावकर याच्याकडून पेपर घेतल्याचा आरोप आहे. मुलासाठी त्याने पेपर घेतल्याचा आरोप आहे.