ठाकरे गटाची इंडिया आघाडीला पुन्हा तीच मागणी, लोकसभेपूर्वी वितंडवाद होणार? काँग्रेसला मोठं टेन्शन

सध्या राज्यातील राजकारणासह देशभरातील राजकारणातील घडामोडी वेगाने सुरु आहेत. त्यातच आता आगामी निवडणुकांच्या पार्श्वभूमीवर इंडिया आघाडीच्या बैठकांचे सत्र सुरू झाल्याचे पाहायला मिळत आहे. मात्र तरी इंडिया आघाडीतील अंतर्गत मतभेद आणि मागण्यांमुळे काँग्रेसची डोकेदुखी वाढण्याची शक्यता आहे. शिवसेना ठाकरे गटाने पुन्हा एकदा इंडिया आघाडीसमोर तीच जुनी आणि आग्रही मागणी ठेवली आहे. त्यामुळे इंडिया आघाडीत नव्या वादाला तोंड फुटणार का? अशी चर्चा आता राजकीय वर्तुळात रंगू लागली आहे.

ठाकरे गटाचे नेते आणि खासदार संजय राऊत यांनी नुकतंच प्रसारमाध्यमांशी संवाद साधला. यावेळी त्यांनी विविध विषयांवर भाष्य केले.  इंडिया आघाडीच्या आगामी महत्त्वाच्या बैठकीबाबत बोलताना खासदार संजय राऊत यांनी पक्षाची भूमिका स्पष्ट केली. ममता बॅनर्जी यांनी पुढाकार घेऊन ही बैठक बोलावली असून, उद्धव ठाकरे मुंबईतून या बैठकीला उपस्थित राहणार आहेत. देशातील विद्यमान सरकार हटवणे हाच या बैठकीचा मुख्य अजेंडा आहे, असे संजय राऊत म्हणाले. मात्र, याच वेळी त्यांनी पंतप्रधानपदाच्या चेहऱ्याबाबत केलेल्या वक्तव्यामुळे काँग्रेसच्या गोटात चिंतेचे वातावरण निर्माण झाले आहे.

ठाकरे गटाची मागणी काय?

संजय राऊत यांनी स्पष्ट केले की, उद्धव ठाकरे यांची पहिल्यापासूनच एक ठाम भूमिका राहिली आहे. निवडणुकीला सामोरे जाताना आपण पंतप्रधानपदासाठी एक चेहरा जनतेसमोर आणायला हवा. महाविकास आघाडीच्या वेळी चेहरा जाहीर करायला उशीर झाला, ज्याचा फटका आपल्याला बसला. २०२४ मध्येही आमची हीच भूमिका होती आणि आता आगामी निवडणुकांना सामोरे जातानाही आपण पंतप्रधानपदाचा चेहरा निश्चित करूनच लोकांसमोर गेले पाहिजे, असे संजय राऊत म्हणाले.

काँग्रेसला टेन्शन का?

‘इंडिया’ आघाडीमध्ये काँग्रेस हा सर्वात मोठा पक्ष असून राहुल गांधी यांच्या नेतृत्वाखाली आघाडी पुढे जात आहे. अशा परिस्थितीत ममता बॅनर्जींचा पुढाकार आणि त्यातच उद्धव ठाकरे यांनी पंतप्रधानपदाचा चेहरा जाहीर करण्यासाठी लावलेला तगादा यामुळे काँग्रेस बॅकफूटवर येण्याची शक्यता आहे. आता इंडिया आघाडीचा पंतप्रधानपदाचा चेहरा कोण असणार? यावरून घटका पक्षांमध्ये वाद होण्याची शक्यता वर्तवली जात आहे. त्यामुळे काँग्रेसचे टेन्शन वाढले आहे.