दोघांनी आयुष्य संपवण्याचं ठरवलं, लॉजवर गेले… फास लावला पण… त्याचं काय झालं? त्या घटनेने जळगावात हळहळ

जळगावमधून एक धक्कादायक आणि हृदयद्रावक बातमी समोर येत आहे. दोघा प्रेमी युगुलांनी आयुष्य संपवण्याचा निर्णय घेतला. दोघेही लॉजवर गेले. दोघांनी गळ्याला फंदा लावला. पण फास तुटल्याने मुलगी वाचली. पण मुलगा वाचू शकला नाही. त्याला रुग्णालयात नेलं असता त्याचा मृत्यू झाला. या घटनेमुळे जळगावात हळहळ व्यक्त केली जात आहे. याप्रकरणी पोलिसांनी गुन्हा नोंदवला असून अधिक तपास सुरू आहे. या तरुणांनी टोकाचं पाऊल उचलण्याचा निर्णय का घेतला? याचाही तपास घेतला जात आहे.

पाचोऱ्याच्या गोराडखेडे रोडवरील एका लॉजमध्ये ही घटना घडली आहे. रवींद्र संजय मोरे असं या 25 वर्षीय तरुणाचं नाव आहे. रवींद्रच्या कुटुंबीयांनी हा सर्व प्रकार संशयास्पद असल्याचं म्हटलं आहे. या प्रकरणाची कसूनच चौकशी करण्याची मागणी त्याच्या कुटुंबीयांनी केली आहे. या घटनेप्रकरणी पाचोरा पोलिसांत अकस्मात मृत्यूची नोंद झाली आहे. पोलीस अधिक तपास करत आहेत.

नेमकं काय घडलं?

रवींद्र मोरेचा विवाह महिन्याभरापूर्वीच ठरला होता. त्याचं लग्न काही दिवसावर आलं होतं. पण त्याचं प्रेम दुसऱ्या मुलीवर होतं. त्यामुळे तो तणावात होता. रवींद्र हा भडगाव तालुक्यातील गिरडचा राहणारा आहे. रवींद्र आणि त्याची अल्पवयीन प्रेयसी हे गुरुवारी सकाळी 10 वाजता गोराडखेडे रोडवरच्या लॉजवर आले होते. खोलीत गेल्यावर दोघांनीही आयुष्य संपवण्याचा निर्णय घेतला. त्यांनी पंख्याला फास लावून जीव देण्याचा प्रयत्न केला. त्यात रवींद्रचा मृत्यू झाला. तर फास तुटल्याने सुदैवाने अल्पवयीन मुलगी वाचली.

या सर्व प्रकाराने घाबरलेल्या मुलीने लगेचच लॉजमधल्या कर्मचाऱ्यांना माहिती दिली. कर्मचाऱ्यांनी तात्काळ रवींद्रला रुग्णालयात नेलं. पण तिथे पोहोचल्यावर त्याला मृत घोषित करण्यात आलं. अचानक घडलेल्या या घटनेने एकच खळबळ उडाली आहे. रवींद्रचे कुटुंबीय तात्काळ घटनास्थळी आले. त्यांनी या सर्व प्रकारावर संशय व्यक्त केला आहे. हा घातपात असल्याचं त्यांचं म्हणणं आहे. तसेच या प्रकरणाची सखोल चौकशी करण्याची मागणी केली आहे. दरम्यान, या सर्व प्रकाराने मुलगी प्रचंड घाबरलेली असून तिने अद्याप काहीच प्रतिक्रिया दिलेली नाही. या मुलीच्या प्रतिक्रियेनंतरच प्रकरणाची दुसरी बाजू समोर येणार असल्याचं सूत्रांनी सांगितलं.