Rahul Narvekar : मुख्य निवडणूक आयुक्त ज्ञानेश कुमार यांचा राजीनामा घ्यावा का? राहुल नार्वेकर म्हणाले..

महाराष्ट्र विधानसभेचे अध्यक्ष राहुल नार्वेकर यांनी आज टीव्ही 9 मराठीच्या कार्यालयात येऊन गणपती बाप्पाचं दर्शन घेतलं. यावेळी ते सध्या सुरु असलेल्या वेगवेगळ्या विषयांवर दिलखुलासपणे बोलले. गणपती बाप्पाकडे काय मागितलं, या प्रश्नावर ते म्हणाले की, “गणपती बाप्पाची कृपा मुंबईकरांवर, देशावर राहिली आहे. तीच कृपा कायम रहावी. बळीराजा संकटात आहे, त्याला चांगले दिवस लवकरात लवकर यावेत. निर्सगाचा लहरीपणा यापुढे तरी लागू होऊ नये अशी प्रार्थना केली आहे” “मला खात्री आहे, आपल्या सर्वांच्या साथीने आणि बाप्पााच्या आशिर्वादाने बळीराजाला ताकद, शक्ती प्राप्त होईल” असं राहुल नार्वेकर म्हणाले. निवडणूक आयोगातील मतभेदांचा मुद्दा सध्या गाजतोय. त्यावरही ते बोलले. “निश्चितपणे अनियमितता असेल तर चौकशी होईल. पण मला वाटतं संवैधानिक संस्थांवर इतक्या सहजासहजी आरोप करणं योग्य नाही, ज्या काय उपायोजना असतील. सत्य पडताळणी करायची असेल तर योग्य स्तरावर होईल”

मुख्य निवडणूक आयुक्तांवर दोन सहआयुक्तांनी आक्षेप घेतलेत. त्यावर सुद्धा राहुल नार्वेकरांनी आपली भूमिका मांडली. “एकूणच निवडणूक आयोगाच्या कार्यपद्धतीची संपूर्ण माहिती माझ्याकडे नाहीय. ही एक संवैधानिक संस्था आहे. स्वायत्त संस्था आहे. अशा संस्थेच्या कार्यपद्धतीबद्दल, त्यांच्या प्रमुखांच्या कार्यपद्धतीबद्दल चर्चा करण अयोग्य राहिलं. कोर्ट आहे, न्याय संस्था आहे, इतर माध्यमातून सत्य पडताळणी करता येऊ शकते. ते होईपर्यंत या विषयावर मोघम बोलणं योग्य राहणार नाही” असं राहुल नार्वेकर म्हणाले.

ज्ञानेश कुमार यांच्या राजीनाम्याच्या मागणीवर काय म्हणाले?

ज्ञानेश कुमार यांच्या राजीनाम्याची मागणी केली जातेय. त्यावर सुद्धा राहुल नार्वेकर यांनी उत्तर दिलं. “भारताचा निवडणूक आयोग जगप्रसिद्ध आहे. अनेक देशांच्या निवडणुकांमध्ये भारतीय निवडणूक आयोगाची निरीक्षक म्हणून नियुक्ती केली जाते. या संस्थेच्या विश्वासहर्तेवर प्रश्नचिन्ह निर्माण करण्यासारखी विधानं घातक आहेत. जे काय बरोबर असेल चुकीचं असेल त्याची सत्यपडताळणी होईल. अशी विधानं करुन आपल्या देशातील प्रभावशाली संस्थेची बदनामी करणं योग्य राहणार नाही” असं राहुल नार्वेकर म्हणाले.

एकनाथ शिंदे, अजित पवार हे निवडणूक आयोगामुळे जिंकले असा आरोप संजय राऊत यांनी केला. त्यावर राहुल नार्वेकर म्हणाले की, “निवडणूक आयोगामुळे एखादा पक्ष जिंकत नाही, जनतेमुळे जिंकतो. अशा प्रकारचे आरोप करणं दुर्देवी आहे”