मोठी बातमी: मराठा आरक्षणावरुन आंदोलक आक्रमक; 7 नोव्हेंबरला मातोश्रीवर धडकणार मशाल मोर्चा

7 नोव्हेंबरला संध्याकाळी पाच वाजता मातोश्रीच्या दिशेने मशाल मोर्चा निघेल. | Maratha Kranti Morcha

मोठी बातमी: मराठा आरक्षणावरुन आंदोलक आक्रमक; 7 नोव्हेंबरला मातोश्रीवर धडकणार मशाल मोर्चा

मुंबई: सर्वोच्च न्यायालयात मराठा आरक्षणाची सुनावणी लांबणीवर पडल्यामुळे आक्रमक झालेले मराठा आंदोलक आता थेट मुख्यमंत्री उद्धव ठाकरे यांचे निवासस्थान असलेल्या मातोश्रीवर धडकणार आहेत. येत्या 7 नोव्हेंबरला मराठा क्रांती मोर्चाकडून मातोश्रीवर मशाल मोर्चा काढण्यात येणार आहे. या मोर्चात सर्वपक्षीय मराठा आमदारांनी सहभागी व्हावे, असे आवाहन संघटनेच्यावतीने करण्यात आले आहे. त्यामुळे आता मराठा क्रांती मोर्चाच्या या निर्णयाचे काय पडसाद उमटणार, हे पाहावे लागेल. (Maratha kranti Morcha Mashal March on Matoshree)

मराठा क्रांती मोर्चाचे पदाधिकारी आणि कार्यकर्ते यांची गुरुवारी मुंबईत बैठक पार पडली. या बैठकीत मातोश्रीवर मशाल मोर्चा घेऊन जाण्याचा निर्णय झाला. त्यानुसार 7 नोव्हेंबरला संध्याकाळी पाच वाजता मातोश्रीच्या दिशेने मशाल मोर्चा निघेल. याशिवाय, अशोक चव्हाण यांच्या अध्यक्षतेखालील मराठा आरक्षण उपसमितीही बरखास्त करण्यात यावी, असा ठराव या बैठकीत मंजूर करण्यात आला.

मराठा क्रांती मोर्चाच्या प्रमुख मागण्या खालीलप्रमाणे

1. मराठा समाजावर अन्याय करणारी अशोक चव्हाण यांच्या अध्यक्षतेखाली असलेली संपूर्ण उपसमिती बरखास्त करून नवीन समिती बनवली जावी. या नव्या समितीत विरोधी पक्षाचा पण समावेश करावा.
2. मराठा अरक्षणावरील स्थगिती उठवण्यासाठी घटनापीठाच्या निर्मितीसाठी सरकारने युद्धपातळीवर प्रयत्न करावेत.
3. मराठा तरुणांच्या नोकऱ्या, विद्यार्थ्यांचे अ‍ॅडमिशन संरक्षित केले जावेत.

पुण्यात उदयनराजे भोसले यांच्या उपस्थितीत मराठा आरक्षण परिषद

मराठा आरक्षण आंदोलनाची पुढील दिशा निश्चित करण्यासाठी शुक्रवारी पुण्यात मराठा आरक्षण परिषद होणार आहे. रेसिडन्सी क्लब येथे आयोजित करण्यात आलेल्या या परिषदेला भाजप खासदार उदयनराजे भोसले उपस्थित राहणार आहेत.  दुपारी 2 ते 5 या वेळेत ही मराठा आरक्षण परिषद पार पडेल.

मराठा आरक्षणावरील स्थगिती उठवण्यासंदर्भातील सुनावणीसाठी राज्य सरकारचा सरन्यायाधीशांकडे अर्ज

27 ऑक्टोबर रोजी सर्वोच्च न्यायालयात मराठा आरक्षणावर सुनावणी झाली होती. यावेळी महाराष्ट्र सरकारचे वकील मुकुल रोहतगी यांनी या प्रकरणाची सुनावणी घटनापीठाकडे वर्ग करावी किंवा 4 आठवड्यांची मुदत देण्याची मागणी केली होती. त्यानुसार न्यायालयाने चार आठवड्यासाठी ही सुनावणी पुढे ढकलण्यात येत असल्याचे म्हटले होते. मात्र, मराठा आरक्षणावरील स्थगिती उठवण्यासंदर्भात बाजू ऐकून घेण्यास न्यायालयाने नकार दिला होता.

त्यामुळे राज्यातील मराठा आंदोलक आक्रमक झाले आहेत. आरक्षणाला स्थगिती मिळाल्याने शैक्षणिक प्रवेशावेळी मराठा समाजातील विद्यार्थ्यांचे काय होणार, असा प्रश्न निर्माण झाला आहे. त्यामुळे राज्य सरकार मराठा आरक्षणावरील स्थगिती उठवण्यासाठी आग्रही आहे. राज्य सरकारने बुधवारी सरन्यायाधीशांकडे तसा अर्ज पाठवला होता.

संबंधित बातम्या:

‘शरद पवारांनी मराठा आरक्षणाविषयक भूमिका स्पष्ट करावी; मग आम्ही पुढची दिशा ठरवू’

मराठा आरक्षणाच्या आड कुणीही येऊ नये : उद्धव ठाकरे

…तर खंबीर मराठा समाज ठाकरे सरकारला गंभीर केल्याशिवाय राहणार नाही : उदयनराजे भोसले

(Maratha kranti Morcha Mashal March on Matoshree)

कमेंट करा

कमेंट करा

Your email address will not be published. Required fields are marked *