IPL सारखी पेपरची बोली लावा म्हणजे… MMRD परीक्षेवरून अभिजीत दिपके संतापले, गंभीर आरोप काय?

कॉकरोच जनता पार्टीचे संस्थापक अभिजीत दिपके हे दिल्लीतील यशस्वी आंदोलनानंतर देशातील शिक्षण व्यवस्था सुधारण्यावर भर देत असल्याचे समोर आले आहे. नीट पेपरफुटीनंतर सुरू झालेल्या आंदोलनाला संपूर्ण देशातून पाठिंबा मिळाला होता. अशातच आता अभिजीत दिपके यांनी MMRD परीक्षेत घोटाळा झाल्याचा आरोप केला आहे. अभिजीत दिपके यांनी नेमकं काय म्हटलं ते सविस्तर जाणून घेऊयात.

16 पैकी 13 टॉपर एकाच सेंटरवरील

अभिजीत दिपके यांनी म्हटले की, MMRD मध्ये परीक्षा दिलेले विद्यार्थी काही दिवसापूर्वी माझ्याकडे आले होते. जी परीक्षा झाली आहे त्याबद्दल खूप मोठा प्रश्न निर्माण होत आहे. ज्याला सिडकोच्या परीक्षेत 80 मार्क मिळाले होते तो इथे टॉपर आहे. सिडकोच्या परीक्षेत 200 पैकी 88 मार्क मिळालेल्या विद्यार्थ्याला MMRD मध्ये 184 मार्क्स मिळाले. धक्कादायक गोष्ट म्हणजे 16 टॉपर पैकी 13 टॉपर एका सेंटरवरचे आहेत. जे जास्त अभ्यास करतात त्यांना एकच सेंटर भेटतं असं काही नाही. तसेच एकच सेंटर भेटल्यावर सरस्वती प्रसन्न होते आणि तुम्ही हुशार होता असंही काही नाही.

पेपरची आयपीएलसारखी बोली लावा…

पुढे बोलताना दिपके यांनी म्हटले की, 16 पैकी 13 टॉपर एकाच सेंटरवरचे आहेत, त्यामुळे त्या ठिकाणी काहीतरी गडबड झाली आहे, काहीतरी सेटिंग झाली आहे. बॉम्बे हायकोर्टाची जी परीक्षा झाली होती तिथे सुद्धा फॉल्टी सेंटर निवडण्यात आले होते. जी मुलं टॉपर आहेत त्याच्यात काही अधिकाऱ्यांची मुलं आहेत. याची जुडेशील चौकशी करण्यात यावी अशी विद्यार्थ्यांची मागणी आहे, कारण SIT वर लोकांचा भरोसा नाही. आयपीएलमध्ये जशी बोली लावतात तशी परीक्षेची बोली लावा म्हणजे विद्यार्थ्यांचा वेळ वाया जाणार नाही.

घोटाळा करणाऱ्यांची चौकशी करा…

MMRD परीक्षा दिलेल्या एका विद्यार्थीनीने सांगितले की, परीक्षा घ्या म्हणून आम्हाला आंदोलन करावं लागतं, पुन्हा निकाल लावा म्हणून आंदोलन करावं लागतं. पुणे महानगरपालिकेत सुद्धा घोटाळा झाला आहे, आमचे तिथे सुद्धा आंदोलन सुरू आहे. आम्ही हेच काम करत बसलो तर अभ्यास कधी करायचा, ज्या मुलांनी फ्रॉड केला त्यांची चौकशी करा. जे पण हे 19-20 मुले आहेत त्यांच्यावर कठोर कारवाई झाली पाहिजे.