शिंदे गटाचे सर्व आमदार लवकरच…कोर्टातील सुनावणी होताच राऊतांचं मोठं विधान; काहीतरी मोठं घडणार?

Shivsena Court Hearing : शिवसेना पक्ष नेमका कोणाचा? तसेच शिवसेना पक्षाचे निवडणूक चिन्ह कोणाचे? याबाबत आज (5 ऑगस्ट) सर्वोच्च न्यायालयात सुनावणी पार पडली. यावेळी उद्धव ठाकरे यांच्या पक्षाची बाजू ज्येष्ठ वकील कपिल सिब्बल यांनी मांडली. यावेळी सिब्बल यांनी पक्षाची घटना आणि या घटनेत असलेल्या तरतुदींचा आधार घेत जोरदार युक्तिवाद केला. यावेळी नियमानुसार शिंदे यांचे सर्वच आमदार अपात्र ठरतील, असा युक्तीवाद केला. आता पुन्हा एकदा 6 ऑगस्ट रोजी या प्रकरणावर न्यायालयात सुनावणी होईल. दरम्यान, आजची सुनावणी पार पडल्यानंतर ठाकरे यांच्या पक्षाचे नेते तथा खासदार संजय राऊत यांनी महत्त्वाची प्रतिक्रिया दिली. शिंदेंचे सर्व आमदार अपात्र ठरतील, असे ते म्हणाले.

 संजय राऊत काय म्हणाले?

त्यांची प्रत्येक कृती बेकायदेशीर आहे. भारतीय संविधानातील दहाव्या शेड्यूल तसेच परिच्छेद दोननुसार शिंदे यांच्यासोबत गेलेले सर्व आमदार हे अपात्र ठरतील. शिवसेनेचे चिन्ह आणि मूळ शिवसेना ही त्यांच्याकडे अत्यंत बेकायदेशीरपणे सोपवण्यात आलेली नाही. कोणताही नियम, कोणताही कायदा, संविधानातील कोणत्याही तरतुदीनुसार शिवसेने सोपवण्याचा निर्णय घेण्यात आलेला नाही. हेच आज कपिल सिब्बल यांनी सर्वोच्च न्यायालयापुढे मांडले आहे.

ठाकरेंच्या वकिलाने न्यायालयापुढे काय बाजू मांडली?

सर्वोच्च न्यायालयात सुनावणी पार पडल्यानंतर ठाकरे गटाचे खासदार अनिल देसाई यांनीदेखील माध्यमांना प्रतिक्रिया दिली. आज आमच्याकडून राजकीय पक्ष आणि विधिमंडळ पक्ष यातील फरक अधोरेखित करण्यात आला. कोणतेही पाऊल उचलताना किंवा कुठलीही नेमणूक करताना पक्षाने ठरवलेल्या चौकटीचा विचार करावा लागतो. अशा निर्णयांना सर्वांची मान्यता असते. या सर्व गोष्टींचे उल्लंघन करून कशाप्रकारे सादर करण्यात आल्या याबाबत आज आम्ही आमची बाजू मांडली. आम्ही सुभाष देसाई केसचे दाखलेही दिले, कोर्टानेही त्या गोष्टी मान्य केल्या की काही गोष्टींचे उल्लंघन झालेले आहे, असे अनिल देसाई यांनी सांगितले.

शिंदे गटाचे वकीलही मांडणार बाजू

दरम्यान, या प्रकरणाची सुनावणी 6 ऑगस्ट रोजी पुन्हा एकदा सुनावणी होणार आहे. त्यामुळे कपिल सिब्बल यांच्या युक्तिवादानंतर शिंदे गटाचे वकील आपली बाजू मांडणार आहेत. त्यामुळे या प्रकरणात निकाल काय लागणार, याकडे सर्वांचेच लक्ष लागले आहे.