Mumbai Megablock : वीकेंडला फिरायला पडताय बाहेर ? मेगाब्लॉकची वेळ तपासली का, नाहीतर अडकाल !

लाखो मुंबईकरांची जीवनवाहिनी अर्थात लाइफलाइन असलेल्या रेल्वेतून रोजचा प्रवास करणारे अनेक आहेत. ऑफीस, शाळा, कॉलेजेस, कामासाठी बाहेर पडणारे लाखो मुंबईकर रेल्वेच्या मध्य, पश्चिम आणि हार्बर या तिन्ही मार्गांवरून निर्धोक प्रवास करत असतात. मात्र याच रेल्वेच्या दुरूस्तीसाठी तसेच देखभालीसाठी वेळोवेळी मेगाब्लॉक घेतला जातो. सध्या शाळांच्या परीक्षा संपून सुट्ट्यांचा मौसम आहे, त्यामुळे अनेक जण फिरायला, हुंदडायला बाहेर पडण्याचा प्लान करतात. वीकेंडला तर फिरायला जाणाऱ्यांची खूप गर्दी असते. वीकेंड पाहून तुम्हीही बाहेर पडायच्या विचारात असाल तर थांबा.. हे आधी वाचा ! कारण मुंबई लोकलच्या मध्य, हार्बर रेल्वेवर रविवारी मेगाब्लॉक घेतला जाणार आहे.

मध्य रेल्वेवर मेगाब्लॉक

मध्य रेल्वेवरील ठाणे आणि डोंबिवली येथील फलाट विस्तारासाठी, अप आणि डाऊन धीम्या मार्गावर शनिवारी रात्रकालीन विशेष वाहतूक व पॉवर ब्लॉक घेण्यात येणार आहे. या ब्लॉकमुळे शनिवारी शेवटची सीएसएमटी- खोपोली लोकल रात्री 10.28 वाजता असेल. तर ठाणे स्थानकातील फलाट क्रमांक 3 व 4 च्या विस्तारासाठी आणि डोंबिवली स्थानकावरील फलाट 1 ए,1 आणि 2 च्या विस्तारासाठी डाऊन आणि अप धीम्या मार्गावर विशेष ब्लॉक घेण्यात येणार आहे. हा ब्लॉक शनिवारी मध्यरात्री 12 वाजल्यापासून सुरू होईल. तो रविवारी सकाळी 10 पर्यंत सुरू असेल.

तसेच मुलुंड – ठाणे आणि दिवा डोंबिवलीदरम्यान अप आणि डाऊन धीम्या मार्गावर ब्लॉक असेल. शनिवारी रात्री ११.२६ ते रात्री ११.५२ आणि रात्री ३.२३ ते सकाळी ९.५५ या वेळेत कल्याणहून सुटणाऱ्या अप धीम्या मार्गावरील लोकल सेवा कल्याण येथे अप जलद मार्गावर वळवण्यात येतील. त्यामुळे या लोकल ठाकुर्ली आणि कोपर स्थानकांवर थांबणार नाहीत.

हार्बर मार्गावरही असेल मेगाब्लॉक

मध्य रेल्वेच्या मुंबई विभागातील पनवेल – वाशी विभागांदरम्यानच्या हार्बर मार्गावर; तसेच पनवेल आणि ठाणे विभागांदरम्यानच्या ट्रान्स हार्बर मार्गावर विविध अभियांत्रिकी आणि देखभाल दुरुस्तीची कामे हाती घेण्यासाठी रविवार मेगाब्लॉक घेण्यात येणार आहे. पनवेल येथून सकाळी १०.३३ ते दुपारी ३.४९ दरम्यान छत्रपती शिवाजी महाराज टर्मिनसच्या दिशेने जाणाऱ्या अप मार्गावरील हार्बर सेवा आणि छत्रपती शिवाजी महाराज टर्मिनस येथून सकाळी ९.४५ ते दुपारी ३.१२ पर्यंत पनवेल/बेलापूरच्या दिशेने जाणाऱ्या डाऊन हार्बर मार्गावरील लोकल रद्द करण्यात येणार आहेत.

ट्रान्स हार्बर मार्ग वर पनवेल – ठाणे अप आणि डाऊन मार्गावर सकाळी 10.01 ते दुपारी 3.53 दरम्यान ब्लॉक असेल पनवेल येथून सकाळी 11.02 ते दुपारी 3.53 दरम्यान ठाण्याच्या दिशेने जाणाऱ्या अप मार्गावरील ट्रान्स-हार्बर सेवा आणि ठाणे येथून सकाळी 10.01 ते दुपारी 3.20 दरम्यान पनवेलच्या दिशेने जाणाऱ्या डाऊन ट्रान्स-हार्बर मार्गावरील लोकल रद्द करण्यात येणार आहेत.

ब्लॉक कालावधीत सीएसएमटी -वाशीदरम्यान विशेष लोकल धावतील. ब्लॉक कालावधीत ठाणे -वाशी / नेरुळ स्थानकांदरम्यान ट्रान्स-हार्बर मार्गावर लोकल उपलब्ध असतील. ब्लॉक कालावधीत पोर्ट मार्गिकेवरील लोकल उपलब्ध असतील.

पश्चिम रेल्वेवरही असेल ब्लॉक

मध्य आणि हार्बरप्रमाणेच पश्चिम रेल्वे मार्गावरही ब्लॉक असणार आहे. पश्चिम रेल्वे वर सांताक्रूझ आणि गोरेगाव स्थानकांदरम्यान अप आणि डाऊन जलद मार्गावर सकाळी 10 ते दुपारी 3 दरम्यान ब्लॉक असेल . ब्लॉक कालावधीत, जलद मार्गावरील सर्व लोकल सांताक्रूझ – गोरेगाव स्थानकांदरम्यान धिम्या मार्गावर धावतील. या ब्लॉकमुळे काही लोकल रद्द करण्यात येणार आहेत. तर काही बोरिवली आणि अंधेरी लोकल हार्बर मार्गावरून गोरेगावपर्यंत धावतील.

पालघर आणि उमरोली स्थानकांदरम्यान ब्लॉक

पालघर आणि बोईसर स्थानकांदरम्यानच्या दगडी कमानी पुलाच्या जागी नवीन पूल बांधण्यासाठी लागणाऱ्या बॉक्स पुश कामासाठी, पालघर आणि उमरोली स्थानकांदरम्यानचा आरएच गर्डर काढण्यासाठी पश्चिम रेल्वेतर्फे शनिवारी (१८ एप्रिल) एक जंबो ब्लॉक घेतला जाणार आहे.  या ब्लॉकमुळे, काही गाड्या रद्द केल्या जातील, काही गाड्या कमी अंतरावर थांबवल्या जातील किंवा त्यांचे नियमन केले जाणार असल्याची माहिती पश्चिम रेल्वेने दिली आहे.

शनिवार १८ एप्रिल रोजी मध्यरात्री ०२:१० ते पहाटे ०५:१० या वेळेत पालघर आणि उमरोली स्थानकांदरम्यानच्या डाउन लाईनवर ब्लॉक लागू करण्यात येईल.  याव्यतिरिक्त, 18/19 एप्रिल रोजी रात्री ११:१५ ते मध्यरात्री ०२:१५ या वेळेत अप आणि डाउन दोन्ही लाईन्सवर देखील ब्लॉक लागू करण्यात येईल.