गुढीपाडव्याच्या मुहूर्तावर ‘सुवर्ण’संधी, सोन्याच्या दरात घट

मुंबई : साडेतीन मुहूर्तांपैकी एक असलेल्या गुढीपाडव्याच्या मुहूर्तावर अनेक लोक सोने-चांदी खरेदीला प्राधान्य देतात. यंदा तुम्हीही गुढीपाडव्याच्या निमित्ताने सोने खरेदी करु शकता, कारण ऐन गुढीपाडव्याच्या तोंडावर सोन्याच्या दरात प्रतितोळा दोन हजारांनी घट झाली आहे. तसेच सराफा बाजारात चांदीच्या दरातही चार हजारांनी घट झाली आहे. यामुळे ग्राहकांसाठी सोने खरेदी करण्याची सुवर्णसंधी आहे.

गुढीपाडवा म्हणजे हिंदू नववर्षाची सुरुवात. हिंदू धर्मामध्ये गुढीपाडवा हा दिवस साडेतीन मुहूर्तांपैकी एक मानला जातो. या मुहूर्तावर इलेक्‍ट्रॉनिक, रिअल इस्टेट, वाहन आणि सोने-चांदी खरेदी करणे शुभ मानले जाते. वर्षाच्या पहिल्याच दिवशी नवीन वस्तू घरात येणे सकारात्मकचे प्रतीक समजलं जाते. त्यामुळे अनेकजण या दिवशी नवीन वस्तू खरेदी करण्याला प्राधान्य देतात.

यंदा ऐन गुढीपाडव्याच्या मुहूर्तावर आंतरराष्ट्रीय बाजारात डॉलरचा दर घसरल्याने सोन्याच्या दरात 2 हजाराने घट झाली आहे. सध्या सराफा बाजारात 24 कॅरेट सोन्याचा दर 32 हजार 220 रुपये आहे. तर 10 ग्रॅम सोन्याचे दर 31 हजार 110 रुपये आहे. विशेष म्हणजे दिवाळीनंतर सोन्याचा हा सर्वात निच्चांकी दर आहे.

तसेच चांदीच्या किंमतीतही चार हजारांनी घट झाली आहे. सध्या सराफा बाजारात चांदीचा दर 40 हजार 357 रुपये प्रति किलो असा आहे.

या कारणामुळे घट

सध्या सराफा बाजारात सोने चांदीच्या खरेदीत घट झाली आहे. तसेच आंतरराष्ट्रीय बाजारात सोन्याचे दरही कमी झाले आहेत. तसेच डॉलरच्या किंमतीतही घसरल्याचे चित्र पाहायला मिळत आहे. या तीन प्रमुख कारणामुळे सोने चांदीच्या दरात घट झाली आहे.

पाहा व्हिडीओ :