हजारोंच्या गर्दीतून मौलाना अजहरीला घेऊन गुजरात ATS जुनागढला रवाना, घाटकोपरमध्ये काय घडलं?

junagadh hate speech case : गुजरात पोलिसांनी रविवारी मुंबईत राहणारा इस्लामिक उपदेशक मौलाना सलमान अजहरीला ताब्यात घेतलं. गुजरातच्या जुनागढमध्ये प्रक्षोभक भाषण केल्याचा अजहरी यांच्यावर आरोप आहे. मुंबई पोलिसांनी मौलाना आणि अन्य दोघांविरोधात आयपीसीच्या कलम 153(सी), 505(2), 188 आणि 114 अंतर्गत गुन्हा नोंदवलाय. सलमान अजहरी यांना घाटकोपर पोलीस स्टेशनमध्ये आणण्यात आलं होतं. सलमान अजहरी यांना पोलीस स्टेशनमध्ये आणल्याच समजताच त्यांचे हजारो समर्थक सुटकेची मागणी करण्यासाठी घाटकोपर पोलीस स्टेशनबाहेर जमले. त्यामुळे परिसरातील वाहतुकीवर परिणाम झाला. पोलिसांनी सुरक्षा बंदोबस्त वाढवला.

या दरम्यान मौलाना सलमान अजहरी यांनी पोलीस स्टेशनबाहेर जमलेल्या आपल्या समर्थकांना कायदा-सुव्यवस्था कायम राखण्याच आवाहन कराव लागलं. मौलानाने घाटकोपर पोलीस स्टेशनबाहेर जमलेल्या गर्दीला माइकवरुन संबोधित केलं. ते म्हणाले की, “मी गुन्हेगार नाहीय. मला कुठल्या गुन्ह्यासाठी इथे आणलेलं नाहीय. ते आवश्यक चौकशी करतायत आणि मी त्यांना सहकार्य करतोय. माझ्या नशिबात लिहील असेल, मला अटक झाली, तर त्यासाठी सुद्धा मी तयार आहे” मौलान अजहरीला दोन दिवसांचा ट्रांजिट रिमांड देण्यात आला आहे. गुजरात पोलीस त्यांना घेऊन जुनागढला रवाना झाले आहेत.

अजून कोणाला अटक?

मौलाना सलमान अजहरीच्या प्रकरणात गुजरात पोलिसांनी भारतीय दंड संहिता (IPC) कलम 153 बी आणि 505 (2) अंतर्गत मोहम्मद यूसुफ मालेक आणि अजीम हबीब या दोन स्थानिक आयोजकांना अटक केलीय. मुफ्ती अजहरी यांच्यावर मागच्या बुधवारी जुनागढ येथे एका कार्यक्रमात आपत्तीजनक भाषण दिल्याचा आरोप आहे.

इस्लामिक उपदेशकाच्या वकिलाने काय सांगितलं?

मुफ्ती अजहरी यांच्या भाषणाचा व्हिडिओ शनिवारी इंटरनेटवर व्हायरल झाला. त्यानंतर पोलिसांनी जुनागढमधील कार्यक्रमाच्या आयोजकांना अटक केली. मौलानाला पकडण्यासाठी शोध मोहिम सुरु झाली होती. अजहरी यांच्या भाषणातून धर्म आणि नशामुक्तीबद्दल जागरुकता होईल, असं सांगून आयोजकांनी कार्यक्रमाला परवानगी मागितली होती. पण येथील भाषणात त्यांनी प्रक्षोभक शब्दांचा वापर केला. मौलाना अजहरीच्या वकीलांनी ANI शी बोलताना सांगितलं की, ‘इस्लामिक उपदेशक चौकशीत सहकार्य करायला तयार आहे’