ED च्या अधिकाऱ्यांनी मुंबईतील बिझनेसमनकडून उकळली 2.25 कोटीची खंडणी, थेट पर्सनल माहिती बाहेर काढण्याची धमकी

ब्रिजभान, प्रतिनिधी : मुंबईतील व्यावसायिकाकडून 2.25 कोटी रुपयांची खंडणी उकळल्याप्रकरणी जयपूरमधील अंमलबजावणी संचालनालयाच्या (ईडी) दोन अधिकाऱ्यांविरोधात एफआयआर दाखल करण्यात आला आहे. जयपूरमध्ये तैनात असलेल्या ईडीच्या दोन अधिकाऱ्यांवर मुंबईतील एका व्यावसायिकाला धमकावून त्याच्याकडून 2.25 कोटी रुपयांची खंडणी उकळल्याचा आरोप आहे. हा आरोप केल्यानंतर गोरेगावच्या बांगूर नगर पोलीस ठाण्यात एफआयआर दाखल करण्यात आला आहे. या प्रकरणाचा तपास करण्याची जबाबदारी मुंबई गुन्हे शाखेकडे सोपवण्यात आली आहे.

विंट्री टेक प्रायव्हेट लिमिटेडचे ​​मालक अमूल्य वस्सा यांनी तक्रार केली आहे. तक्रारीत असा आरोप करण्यात आला आहे की, दोघां आरोपीनी वासा यांची प्रतिष्ठा खराब करण्याची धमकी दिली आणि त्यांच्या वैयक्तिक आयुष्याबद्दलच्या माहितीचा उल्लेख केला.

मुंबईत वकिलाच्या घरी मोलकरणीची 10 लाखांच्या कॅशवर हातसफाई

घरातील साफसफाई करताना मोलकरणीने सुमारे 10 लाखांच्या कॅशवर हातसफाई केल्याची घटना वांद्रे परिसरात उघडकीस आली आहे. याप्रकरणी वकिलाच्या तक्रार अर्जावरुन वांद्रे पोलिसांनी संशयित मोलकरीण तनुजा हिच्याविरुद्ध चोरीचा गुन्हा नोंदवून तपास सुरु केला आहे. यातील तक्रारदार व्यवसायाने वकिल असून ते त्यांच्या कुटुंबियांसोबत वांद्रे परिसरात राहतात. त्यांचा रुम लहान असल्याने त्यांचे आई-वडिल जवळच असलेल्या एका इमारतीमध्ये राहत असून त्यांच्याकडे गेल्या एक वर्षांपासून तनुजा ही तरुणी घरकाम करते.

ती त्यांच्या इमारतीमध्येही घरकामासाठी येत असल्याने त्याने तिला त्यांच्या घरी कामासाठी ठेवले होते. 9 सप्टेंबरला त्यांनी त्यांच्या मुलीच्या प्रवेशासाठी दहा लाख रुपये आणले होते.ही रक्कम त्यांनी त्यांच्या आई-वडिलांच्या घरी ठेवली होती. दुसऱ्या दिवशी त्यांची बहिण ही रक्कम घेण्यासाठी गेली होती, मात्र तिला तिथे ती कॅश सापडली नाही.

त्यांच्या घरी तनुजा वगळता इतर कोणीही येत नव्हते. त्यामुळे ही कॅश तिनेच चोरी केल्याचा संशय व्यक्त करुन त्यांनी वांद्रे पोलीस ठाण्यात तक्रार केली होती. त्यांच्या जबानीनंतर पोलिसांनी तनुजाविरुद्ध दहा लाखांची कॅशची चोरी केल्याप्रकरणी गुन्हा दाखल केला आहे. या गुन्ह्यांचा तपास सुरु असून तनुजाची लवकरच पोलिसांकडून चौकशी होणार आहे.

.