डेटिंग ॲपवरून भेटली, पबमध्ये नेलं अन् बिल येताच जो प्रकार घडला… वाचून उडेल तुमची झोप!

सोशल मीडिया आणि डेटिंग ॲप्सवरील मैत्री आता नागपूरमधील तरुणांच्या जीवावर बेतत असल्याचे समोर आले आहे. डेटिंग ॲपवर मैत्री करून तरुणांना आलिशान पबमध्ये बोलावायचे, त्यानंतर त्यांना अवाढव्य बिल भरण्यास भाग पाडून लुटायचे, असे सत्र सध्या शहरात सुरू झाले आहे. या पोलीस ठाण्याच्या हद्दीत घडलेल्या एका गंभीर घटनेने शहरात खळबळ उडाली आहे.

नेमकं काय घडलं?

एका तरुणाने डेटिंग ॲपवर एका तरुणीशी मैत्री केली. काही दिवस नियमित संवाद साधल्यानंतर त्या तरुणीने आपला विश्वास संपादन केला. यानंतर त्याला प्रत्यक्ष भेटण्यासाठी शहरातील एका पबमध्ये आमंत्रित केले होते. तो तरुण कोणतीही शंका न घेता तिथे पोहोचला. या भेटीदरम्यान त्या तरुणीने महागड्या पेयांची आणि जेवणाची मोठी ऑर्डर दिली. काही वेळातच पबच्या व्यवस्थापनाने त्या तरुणाच्या टेबलावर ३४,००० रुपयांचे अवाढव्य बिल आणून ठेवले.

इतक्या मोठ्या रकमेचे बिल पाहून तरुण चक्रावून गेला. त्याने बिलावर आक्षेप घेत विचारणा केली असता पबचा मालक, व्यवस्थापक आणि तेथील बाऊन्सर्स आक्रमक झाले. त्यांनी त्या तरुणाला शिवीगाळ करत मारहाण करण्याची धमकी दिली. एवढेच नाही तर, पैसे न भरल्यास बदनामी करु, अशी भीती दाखवली. त्यानंतर त्या तरुणाने जीवाच्या भीतीने आणि मानहानीच्या भीतीपोटी आपल्या UPI अकाउंटद्वारे ३४ हजार रुपये पब मालकाच्या खात्यावर जमा केले. पैसे ट्रान्सफर होताच, ज्या तरुणीच्या आग्रहाखातर तो तिथे आला होता, ती संधी साधून तिथून पसार झाली.

आपली फसवणूक झाल्याचे लक्षात येताच पीडित तरुणाने तातडीने पोलीस ठाण्यात धाव घेऊन आपबिती सांगितली. पोलिसांनी या घटनेचे गांभीर्य ओळखून तातडीने तपास सुरू केला. पबचा मालक, व्यवस्थापक, बाउन्सर आणि संबंधित तरुणी अशा सर्वांविरुद्ध फसवणूक आणि खंडणीचा गुन्हा दाखल करण्यात आला आहे. यातील एका आरोपीला पोलिसांनी ताब्यात घेतले. उर्वरित आरोपींच्या अटकेसाठी पोलीस पथके रवाना करण्यात आली आहेत.

सायबर सुरक्षिततेचा प्रश्न ऐरणीवर

दरम्यान सध्या नागपूर शहरात अशा प्रकारे अनेक टोळ्या कार्यरत असल्याची शक्यता पोलिसांनी वर्तवली आहे. अनेक पब आणि हॉटेल्स या गुन्हेगारी टोळ्यांशी बांधून असल्याची माहिती समोर येत आहे. पोलीस आयुक्त कार्यालयाने नागरिकांना आवाहन केले आहे की, डेटिंग ॲप्सवर अनोळखी व्यक्तींशी संवाद साधताना अत्यंत खबरदारी घ्यावी आणि अशा पब किंवा हॉटेलमध्ये जाण्याचे टाळावे. जर कोणासोबत अशी घटना घडली असेल, तर त्यांनी न घाबरता नजीकच्या पोलीस ठाण्यात तक्रार नोंदवावी. या घटनेमुळे नागपुरातील सायबर सुरक्षिततेचा प्रश्न पुन्हा एकदा ऐरणीवर आला आहे.