पोटात दुखू लागल्याने मुलीला हॉस्पिटलमध्ये नेले अन् समोर आलेलं सत्य ऐकून डॉक्टरही सुन्न; डोंबिवलीत काय घडलं?

ठाणे जिल्ह्यातील डोंबिवली जवळील निळजे परिसरात एक अत्यंत संतापजनक आणि माणुसकीला काळिमा फासणारी घटना उघडकीस आली आहे. एका १७ वर्षीय अल्पवयीन मुलीला प्रेमाच्या जाळ्यात ओढून मी तुझा नवरा आहे असे भासवून तिच्यावर वारंवार लैंगिक अत्याचार करण्यात आल्याची धक्कादायक घटना समोर आली आहे. या नराधमाच्या कृत्यामुळे पीडित मुलगी दीड महिन्यांची गर्भवती राहिली आहे. सध्या या घटनेमुळे संपूर्ण परिसरात तीव्र संतापाची लाट उसळली आहे.

मिळालेल्या माहितीनुसार, आरोपी सोहम पाटील याने संबंधित अल्पवयीन मुलीशी ओळख वाढवून तिला लग्नाचे खोटे आश्वासन दिले होते. मी तुझ्याशीच लग्न करणार आहे, मी तुझा पती आहे, असे शब्द देऊन त्याने मुलीला मानसिक जाळ्यात ओढले. पीडितेच्या अज्ञानाचा आणि अल्पवयीन असण्याचा गैरफायदा घेत आरोपीने तिच्या राहत्या घरीच तिच्यावर बळजबरीने शारीरिक संबंध प्रस्थापित केले. हे अत्याचार एकदाच थांबले नाहीत तर लग्नाचे आमिष दाखवून त्याने वेळोवेळी पीडितेचे लैंगिक शोषण केले.

अत्याचाराचा पाढा वाचला

गेल्या काही दिवसांपासून पीडित मुलीची प्रकृती खालावली होती. तिला शारीरिक त्रास होऊ लागल्याने पालकांनी काळजीपोटी तिला रुग्णालयात नेले. डॉक्टरांनी केलेल्या वैद्यकीय तपासणीत जी बाब समोर आली, ती ऐकून पालकांच्या पायाखालची जमीन सरकली. पीडित मुलगी ५ ते ६ आठवड्यांची गर्भवती असल्याचे डॉक्टरांनी सांगितले. मुलीला विश्वासात घेऊन विचारपूस केली असता, सोहम पाटील याने केलेल्या अत्याचाराचा पाढा तिने वाचला.

यानंतर पीडितेच्या आईने याप्रकरणी तातडीने मानपाडा पोलीस ठाण्यात धाव घेऊन तक्रार दाखल केली आहे. पोलिसांनी या तक्रारीची गंभीर दखल घेत आरोपी सोहम पाटील याच्याविरुद्ध भारतीय न्याय संहिता (BNS) आणि बालकांचे लैंगिक अपराधांपासून संरक्षण (POCSO) कायद्यांतर्गत गुन्हा दाखल केला आहे. पोलिसांनी गुन्ह्याचे गांभीर्य लक्षात घेऊन घटनास्थळी इन्व्हेस्टिगेशन व्हॅन बोलावली असून, वैज्ञानिक पुरावे गोळा करण्यासाठी पंचनामा करण्याची प्रक्रिया सुरू केली आहे.

नराधमांविरोधात कठोर कारवाई करण्याची मागणी

सध्या पीडित मुलगी सध्या मानसिक धक्क्याखाली असून तिच्यावर रुग्णालयात उपचार सुरू आहेत. तर मानपाडा पोलीस आरोपी सोहम पाटीलचा शोध घेत असून, त्याला कठोर शिक्षा व्हावी यासाठी कायदेशीर प्रक्रियेला वेग आला आहे. या घटनेमुळे अल्पवयीन मुलींच्या सुरक्षेचा प्रश्न या घटनेमुळे पुन्हा एकदा ऐरणीवर आला आहे. तसेच समाजात अशा नराधमांविरोधात कठोर कारवाई करण्याची मागणी जोर धरत आहे.