Nitesh Karale : कराळे मास्तर पदवीधर निवडणूक लढणार, वेळ पडली तर बंडखोरीही करणार

पदवीधर मतदारसंघांच्या मोर्चेबांधणीला सुरुवात झाली आहे. उमेदवारांकडूनदेखील तयारी सुरु असल्याचे दिसत आहे. त्यातच आता कराळे मास्तर म्हणून सोशल मीडियावर लोकप्रिय असलेले नितेश कराळे हेही निवडणुकीत उतरणार आहेत. त्यांनी यावेळी टीव्ह9 मराठीशी बातचीत करताना त्यांचा निवडणुकीबद्दलचं मत सांगितलं आहे. ते म्हणाले की मी मागच्यावेळीसुद्धा होतो. तेव्हा मी तिसऱ्या क्रमांकावर होतो. साडेआठहजार लोकांनी मला मतदान केलं होतं. तेव्हा तर मी व्हायरल होऊन काहीच दिवस झाले होते. पण मला विदर्भ-नागपुरातून चांगला प्रतिसाद दिला. कोणतंही संघटन नसताना मला एवढं मतदान पडलं होतं. तर यावेळीही मी प्रबळ दावेदार आहे, असं कराळे मास्तर म्हणाले आहेत. पदवीधरांचे प्रश्न मांडण्यासाठी विधानपरिषदेत जाण्याची इच्छा असल्याचे यावेळी कराळे मास्तरांनी सांगितले आहे. या जागा खास राखीव असतात, पण हे आमदार कधी विद्यार्थ्यांचे प्रश्नच मांडत नाहीत.

पार्टीची 28 सप्टेंबर रोजी बैठक आहे. त्यामध्ये मी तिकीट मागणार आहे. मी आतापर्यंत अनेक सभा, अनेक कार्यक्रमांमध्ये पक्षासाठी काम केलं आहे. पक्षाच्या अनेक लोकांना निवडून आणण्यात मी खारीचा का असेना वाटा उचलला आहे. मला त्याचं योगदान मिळावं. तिकीट दिलं नाही तर मग आपण अपक्ष जिंदाबाद आहेच, असंही यावेळी कराळेंनी सांगितलं आहे.

लोकसभेला मी माघार घेतली. त्यामुळे काँग्रेसला फायदा झाला. यावेळी आपल्याला न्याय मिळावा, पक्षाने सकारात्मक विचार करावा अशी भूमिका त्यांनी मांडली. आता सगळे पोरं म्हणत आहेत, सर तुम्ही यावेळी उभा रहा. तुम्ही दिल्लीला गेलात. सीजेपीच्या आंदोलनामध्ये तुम्ही विद्यार्थ्यांसाठी भूमिका मांडली. स्वतःवर केसेस घेता. त्यामुळे तुम्ही उभे राहिले पाहिजे, अशी भूमिका विद्यार्थ्यांनी मांडल्याचं त्यांनी सांगितलं.

झिरो बजेट निवडणूक लढण्याचा मानस असल्याचीही माहिती त्यांनी दिली. माझ्यासाठी विद्यार्थीही खर्च करायला तयार आहेत. जास्तीत जास्त 25 लाख रुपये खर्च करुन ही निवडणूक लढू सांगताना त्यांनी तिकीट नाही दिलं तर पक्षाला (राष्ट्रवादी शप) थेट बंडखोरीचा इशाराही दिला आहे.