शेतकऱ्यांची चिंता मिटली, पुण्यातील चासकमान धरण 100 टक्के भरले

Pune Water Dam | गेल्या काही दिवसांमध्ये पुण्यात पावसाने काहीशी विश्रांती घेतली असली तरी भिमाशंकर परिसरात अजूनही जोरदार पाऊस सुरु आहे. त्यामुळेच चासकमान धरण पूर्ण भरून वाहायला लागले आहे.

पावसाने धरणे भरली.

Reporter Ranjeet Jadhav | Edited By: Rohit Dhamnaskar | Updated on: Aug 04, 2021 | 1:06 PM

पुणे: पुणे जिल्ह्यातील खेड व शिरूर तालुक्यातील शेतीचे नंदनवन करणारे चासकमान धरण हे 100 टक्के क्षमतेने भरले आहे. गेल्या महिन्यात पुणे जिल्ह्यात मुसळधार पाऊस झाला होता. त्यामुळे खडकवासला साखळीतील चारही धरणांमधील (Water Dam) पाणीसाठ्यात लक्षणीय वाढ झाली होती. गेल्या काही दिवसांमध्ये पुण्यात पावसाने काहीशी विश्रांती घेतली असली तरी भिमाशंकर परिसरात अजूनही जोरदार पाऊस सुरु आहे.

त्यामुळेच चासकमान धरण पूर्ण भरून वाहायला लागले आहे. चासकमान धरणात पाणी साठवण्याची क्षमता 8.50 टीएमसी इतकी आहे. गेल्यावर्षीच्या तुलनेत 25 दिवस आधीच हे धरण भरले आहे. खबरदारीचा उपाय म्हणुन धरणाच्या पाचही दरवाजाद्वारे भिमानदी पाञात 925 क्युसेक्स वेगाने विसर्ग सोडण्यात आला आहे. तर पॉवर हाऊसमधून 550 क्युसेक्स वेगाने पाण्याचा विसर्ग सुरू आहे. या पार्श्वभूमीवर प्रशासनाकडून भीमानदी काठावरच्या नागरीकांना सावधनतेचा इशारा देण्यात आला आहे.

पुण्याला मुळशी धरणातून पाच टीएमसी पाणी मिळणार

पुणे शहराला मुळशी धरणातून पाच टीएमसी पाणी देण्याचा प्रस्ताव महापालिकेने केला मंजूर केला आहे. महापालिका हद्दीत नव्याने आलेल्या 23 गावांना पाणी पुरवठा करण्यासाठी मुळशी धरणामधून 5 टीएमसी पाणी पुणे शहरासाठी द्यावे असा प्रस्ताव स्थायी समितीच्या बैठकीत मान्य करण्यात आला. आता हा प्रस्ताव राज्य सरकारकडे पाठवण्यात येईल.

पुण्याची लोकसंख्या वाढत असल्याने पाणी कोटा वाढवावा अशी मागणी गेल्या काही वर्षापासून महापालिका करत आहे. महापालिका हद्दीपासून सुमारे 40 किलोमीटर लांब असलेल्या मुळशी धरणातून पाच टीएमसी पाणी आणण्यासाठी पाटबंधारे विभागाची मान्यता मिळावी यासाठी हालचाली सुरु झाल्या आहेत.