पुण्यात लोकप्रतिनिधींच्या घरात चोरी, आमदार माधुरी मिसाळ यांच्या जाऊबाईंचे 18 लाखांचे दागिने लंपास

पुणे : भाजप आमदार माधुरी मिसाळ यांच्या राहत्या घरातून 18 लाख रुपयांच्या दागिन्यांची चोरी झाल्याची माहिती समोर आली आहे. माधुरी मिसाळ यांच्या लहान जाऊ ममता मिसाळ यांच्या बेडरुममधून हे दागिने लंपास झाले आहेत. लग्नात घालण्यासाठी काढलेले दागिने बेडरुमच्या तिजोरीवर ठेवले असता चोरण्यात आले, अशी माहिती ममता यांनी पोलिसांना दिली आहे. याप्रकरणी ममता मिसाळ यांनी वानवडी पोलीस ठाण्यात तक्रार दाखल केली आहे (Jewellery stolen from BJP MLA Madhuri Misal’s residence).

पोलिसांनी दिलेल्या माहितीनुसार, फिर्यादी ममता मिसाळ या वानवडी येथील फेअर रस्त्यावरील दोन नंबरच्या बंगल्यात राहतात. त्यांच्यासोबत पती, मुले, जाऊ आमदार माधुरी मिसाळ आणि त्यांची दोन मुले असे एकत्र राहतात (Jewellery stolen from BJP MLA Madhuri Misal’s residence).

बंगल्यामध्ये काम करण्यासाठी सात महिला कामगार आहेत. यातील काही महिला ममता यांच्या बेडरुममध्ये साफसफाईचे काम नियमितपणे करतात. 28 नोव्हेंबर रोजी ममता या लग्नात दागिने घालण्यासाठी तिजोरीवर ठेवलेला सोन्याच्या दागिन्यांचा बॉक्‍स काढण्यासाठी गेल्या. मात्र त्यांना तेथे बॉक्‍स सापडला नाही.

या बॉक्‍समध्ये हिऱ्यांनी मढवलेला 14 लाखांचा सोन्याचा हार आणि एक हिरे आणि मोतींनी मढवलेले चार लाखाचे सोन्याचे ब्रेसलेट होते. या दोन्ही हारांची किंमत 18 लाख इतकी आहे. याप्रकरणी अज्ञात आरोपीविरोधात वानवडी पोलीस ठाण्यात गुन्हा दाखल झाला आहे.

हेही वाचा : आता Aadhaar प्रमाणे Voter ID सुद्धा डिजीटल; सोबत ठेवण्याचं टेन्शन संपणार