मुलांनी पुढारी व्हावं, असं तुकाराम मुंढेंना का वाटतं? काय आहे या मागचं कारण?

आयएएस अधिकारी तुकाराम मुंढे यांना भलेभले कापत आहेत. तुकाराम मुंढे ज्या खात्यात जातात तिथल्या लोकांना त्यांचा धाक बसतो. आता अन्न आणि औषध प्रशासन विभागात आल्यावर त्यांनी रस्त्यावरच्या ठेल्यांपासून ते बड्या रेस्टॉरंटपर्यंतच्या मालकांना सळो की पळो करून सोडलं आहे. नागरिकांच्या आरोग्याशी हयगय करणाऱ्यांना त्यांनी आपल्या पदाचा चांगलाच खाक्या दाखवला आहे. त्यामुळे अधिकारी असावा तर तुकाराम मुंढे यांच्यासारखाच, अशी चर्चा रंगली आहे. अनेक तरुण मुलंही तुकाराम मुंढे यांच्याप्रमाणेच आयएएस अधिकारी बनण्याचं स्वप्न पाहत आहेत. मात्र, तुकाराम मुंढे यांना आपली मुलं राजकारणी व्हावीत असं वाटतंय. त्यामागचं कारणही त्यांनी स्पष्ट केलंय.

तुकाराम मुंढे यांनी एका मुलाखतीत आपली ही इच्छा व्यक्त केली आहे. पिंपरी चिंचवडमध्ये ते बोलत होते. तुमच्याप्रमाणेच तुमची मुलं प्रशासकीय सेवेत जावेत, असं तुम्हाला वाटतं का? असा सवाल त्यांना करण्यात आला होता. त्यावर त्यांनी थेट नाही म्हणून सांगितलं. भविष्यात माझी मुलं पुढारी किंवा उद्योजक व्हावीत असं मला वाटतं. त्यांनी राजकारण किंवा व्यापारात रमावं असा मी त्यांना सल्ला देईन. आजच्या जेनजीने असे काही मार्ग निवडले पाहिजे की, जिथे तुमच्यावर कोणतीही प्रशासकीय बंधने नसतील. समाजासाठी तुम्ही कोणत्याही दबावाशिवाय आणि मनमोकळेपणे काम करू शकाल, असं तुकाराम मुंढे म्हणाले.

नेमकं काय म्हणाले?

माझ्या मुलांनी जर मला विचारलं त्यांनी प्रशासकीय अधिकारी व्हावं का? तर मी त्यांना थेट सांगेल, अजिबात बनू नका, असं मुंढे म्हणाले. मुंढेंना आपली मुलं उद्योजक किंवा पब्लिक लीडर बनावीत असं वाटतं. कारण सिस्टिमच्या कोणत्याही दबावाशिवाय त्यांना समाजाच्या विकासात योगदान देता येईल. जनसेवा करण्यासाठी राजकारण आणि उद्योग ही दोन क्षेत्र अत्यंत चांगली आहेत. आजच्या युवा पिढीकडे अमर्यादित ऊर्जा आणि ज्ञान आहे. त्यामुळे त्यांचं स्वातंत्र्य चौकटीत अडकून जाईल, अशा करिअरमध्ये या मुलांनी अडकून पडू नये, असं मुंढे म्हणाले.

21 वर्षात 25 बदल्या

तुकाराम मुंढे यांच्या 21 वर्षात 25 बदल्या झाल्या आहेत. त्यांच्या प्रामाणिकपणाचा फटका त्यांच्या कुटुंबीयांनाही बसला आहे. त्यांच्या मते, त्यांचा मुलगा 5वीत जाईपर्यंत त्यांना सहावेळा शाळा बदलावी लागली. त्यांच्या वारंवार होणाऱ्या बदल्यांमुळे त्यांच्या पत्नीलाही मोठा त्रास झाला. जनसेवेचा हा कठिण मार्ग मीच निवडला होता. मी या कठिण प्रसंगांना तोंड द्यायला तयार होतो, असं ते म्हणाले. पण या काळात त्यांच्या कुटुंबीयांना मोठा त्याग करावा लागला. त्यामुळेच त्यांना आपल्या मुलांनी या मार्गाने जाऊ नये असं वाटतं.