Rent a Garba Partner च्या जाहिरातींवरून वाद; भाजप आमदाराकडून ॲपवर बंदीची मागणी

वैभव घाग , प्रतिनिधी :  गणेशोत्सव संपत आला असून आता अवघ्या काही दिवसात घट बसतील आणि नवरात्र सुरू होईल. नवरात्र म्हणताच अनेकांच्या डोळ्यांसमोर येतो तो गरबा. मुंबईसह राज्यभरात आणि देशभरातही अनेक ठिकाणी गरबा नाईटचे आयोजन करण्यात येत आहे. मात्र सध्या या प्रकरणाला एक नवं वळण मिळालं आहे. नवरात्र सुरू होण्यापूर्वीच सोशल मीडियावर एक पोस्ट व्हायरस झाली आहे. Rent A Garba Partner ची पोस्टर्स सध्या अनेक ठिकाणी दिसत असून हा फक्त आता मजेचा किंवा सोशल मीडिया ट्रेंडचा विषय राहिलेला नाही. मुंबईसह ही पोस्ट देशभरातील अनेक शहरात दिसून आली. सोशल मीडियावर हे अकाऊंट समोर आल्यावर हे प्रकरण आता सायबर क्राइमच्या तपासाअंतर्गत आलं आहे.

याचदरम्यान आता भाजपचे आमदार नरेंद्र मेहता यांनी या पोस्टविरोधात भूमिका घेतली आहे. सदर “Rent a Garba Partner” ॲप तात्काळ बंद करण्यात यावे, असं लेखी निवेदन त्यांनी मीरा-भाईंदर वसई विरार चे आयुक्त अनिकेत कौशिक यांना दिलं आहे. सोशल मीडियावर 1000 ते 6500 रुपयांपर्यंत गरबा पार्टनर देण्याच्या नावाखाली सुरू असलेल्या जाहिरातींमार्फत महिला व तरुणींची फसवणूक व सुरक्षेचा प्रश्न निर्माण होत आहे. ॲपचे मालक, निर्माते आणि जाहिरातदारांवर कठोर गुन्हे दाखल करून तातडीने प्रतिबंधात्मक कारवाई केली जावी अशी मागणी त्यांनी केली आहे. यापूर्वीच मुंबईतील भाजप नेते संजय उपाध्याय यांनीही मुंबई पोलिसांना पत्र लिहीलं होतं.  Rent a Garba Partner या जाहिरातींमागे कोण आहे, आणि त्यांचा नेमका उद्देश काय आहे, हे शोधावं अशी मागणी त्यांनी केली होती. तर आता आनदार नरेंद्र मेहाता यांनी देखील हे ॲप तातडीने बंद करण्यात यावे अशी मागणी त्यांच्या निवेदनातून केली आहे. तसेच या अ‍ॅपच्या फसवणुकीपासून सावध राहण्यासाठी पोलिसांनी महिला व तरुणींमध्ये जनजागृती करावी , असंही त्यांनी निवेदनात म्हटलं आहे.

काय आहे पोस्ट ?

Rent a Garba Partner – अशी एक पोस्ट सध्या सोशल मीडियावर व्हायरल झाली आहे. या पोस्टर्समध्ये Silver, Gold आणि Platinum अशी पॅकेजेस तयार करण्यात आली आहेत. काही पोस्टमध्ये 1,000 ते 2,000 पर्यंतची पॅकेजेस आहेत, तर आणखी एका व्हायरल पोस्टमध्ये किंमती 3,000 पासून वाढून 6,500 पर्यंत असल्याचे सांगण्यात आलं आहे. यामध्ये दोन तासांपासून संपूर्ण रात्रभर गरबा पार्टनर, डान्स स्टेप्स शिकवणे, मॅचिंग आउटफिट, सेल्फी, Instagram रील्स आणि फोटो अशा सेवांचा दावा करण्यात आला आहे. काही पोस्टमध्ये तर कपाळावर किस (forehead kiss), रात्री उशिरा फूड आउटिंग आणि घरी सोडण्यात येईल, अशा गोष्टींचाही उल्लेख करण्यात आल्याचे समजते.

मात्र गरबा पार्टनर देण्याच्या नावाखाली सुरू असलेल्या जाहिरातींमुळे महिला व तरुणींची फसवणूक व सुरक्षेचा प्रश्न निर्माण होत असल्याचे बोलले जात असून हे ॲप बंद करण्याची मागणी केली जात आहे. आज नरेंद्र मेहतानी याबद्दल निवेदन दिलं. तर आधी भाजपचे आमदार संजय उपाध्याय यांनी मुंबई पोलिसांकडे या संपूर्ण प्रकरणाची चौकशी करण्याची मागणी केली होती. सोशल मीडिया आणि डेटिंग ॲप्सच्या माध्यमातून अशा प्रकारच्या गतिविधींना प्रोत्साहन दिले जात असल्याची शक्यता व्यक्त करत त्यांनी व्हायरल जाहिरातींची सत्यता, त्यामागे असलेल्या व्यक्ती तसेच आयोजकांची माहिती तपासण्याची मागणी केली.