Alto आणि Swift कारचा भीषण अपघात! एकाच कुटुंबातील चौघे ठार, पुतणी थोडक्यात बचावली!

Sangli Accident : धक्कादायक बाब म्हणजे या भीषण अपघातात एकाच कुटुंबातील चौघांचा मृत्यू झाला आहे. सकाळी नऊ वाजण्याच्या सुमारास हा भीषण अपघात घडला.

मालेगावातील सटाणा रोडचा डेंजर झोन, एकाच ठिकाणी तीन दिवसात तीन अपघातImage Credit source: TV9 Marathi

Reporter Shankar Devkule | Edited By: सिद्धेश सावंत | Updated on: Mar 26, 2022 | 8:08 PM

सांगली : सांगलीतील (Sangli Accident) आष्टानजीक भीषण अपघात झाला आहे. आष्टाजवळील गाताडवाडी इथं स्विफ्ट आणि अल्टो कारचा (Alto and Swift Car accident) भीषण अपघात होऊन चार जणांचा मृत्यू झालाय. तर तिघे जण जखमी झालेत. चारपैकी दोघांचा जागीच मृत्यू झाला आहे. तर दोघांचा रुग्णालयात उपचारादरम्यान मृत्यू झाला असल्याची माहिती समोर आली आहे. एका जखमीला सध्या रुग्णालयात उपचारासाठी दाखल करण्यात आलं आहे. धक्कादायक बाब म्हणजे या भीषण अपघातात एकाच कुटुंबातील चौघांचा मृत्यू झाला आहे. सकाळी नऊ वाजण्याच्या सुमारास हा भीषण अपघात घडला. अपघातात दोघांचा जागीच जीव गेला. तर अपघातानंतर दोघांना तातडीनं नजीकच्या रुग्णालयात दाखल करण्यात आलं. मात्र उपचारादरम्यान, त्यांचाही मृत्यू झाल्यानं कुटुंबीयांवर दुःखाचा डोंगर कोसळलाय. एका घरगुती कार्यक्रमाला जात असतेवेळी या कुटुंबावर काळानं घाला घातला आहे. अचानक समोरच्या कारनं ब्रेक लावल्यामुळे मागून येणाऱ्या ट्रक चालकाला गाडी कंट्रोल करता आली नाही. आणि त्यानं मागून कारला धडक दिली. या भीषण अपघाताबाबत माहिती मिळाल्यानंतर पोलिसांनी (Sangli Police) तत्काळ घटनास्थळी धाव घेतली.

एकाच कुटुंबातील चौघांवर काळाचा घाला

मलकापूरचं एक कुटुंब घरगुती कार्यक्रमासाठी जायला निघाल होतं. मलकापूरहून हे कुटुंब सांगलवाडी इथं जाणार होतं. मात्र वाटेतच त्यांच्यावर काळानं घाला घातला. मलकापूरचे अधिकराव पोळ, त्यांची आई गीताबाई, पत्नी सुष्मा, भावजय सरीता आणि त्यांची पुतणी असे सगळे एकत्र प्रवास करत होते.

पाच जण मिळून गाडीतून निघाले असता अचानक वाटेत समोरील कारनं ब्रेक लावला. त्यामुळे कार चालवणाऱ्या पोळ यांनाही तातडीनं ब्रेक लावावा लागला. या दरम्यान, मागून येणाऱ्या डम्परच्या चालकाला मात्र अचानक लावलेल्या ब्रेकमुळे गाडी कंट्रोल करता आली नाही. डम्परनं जोरदार धडक पोळ यांच्या गाडीला दिली. यात पोळ आणि कुटुंबीयांची गाडी मधल्या मध्ये भरडली गेली. या अपघातात दोघांची जागीच जीव गेला. तर दोघे जण गंभीर जखमी झाले होते.

दोघांचा जागीच, तर दोघांचा रुग्णालयात मृत्यू

या अपघातानंतर नागरिकांनी तातडीनं पोलिसांना या घटनेची माहिती दिली. पोलिसांनीही तत्काळ घटनास्थळी धाव घेत बचावकार्य करण्यास सुरुवात केली. नागरिकांच्या मदतीनं पोलिसांनी दोघांचे मृतदेह बाहेर काढले आणि तिघा गंभीर जखमींना तातडीनं रुग्णालयात उपचारासाठी दाखल केलं.

तिघा जखमींपैकी दोघांनी रुग्णालयात जीव सोडलाय. दरम्यान, या भीषण अपघातातून पोळ यांची पुतळी बालंबाल बचवली आहे. मात्र संपूर्ण पोळ कुटुंबावर या अपघाताच्या घटनेनं दुःखाचा डोंगर कोसळलाय.