मोदी सरकार कोसळून नवीन पंतप्रधान येणार? संजय राऊतांच्या दाव्याने खळबळ, म्हणाले, मोदींच्या जागी….
भाजप सरकार कोसळून नवीन पंतप्रधान येणार असल्याचा दावा संजय राऊतांनी केला आहे. त्याचबरोबर मोदींच्या जागी नवीन पंतप्रधान येणार असल्याचाही खळबळजनक दावा त्यांनी केला.
दिल्लीसह देशातील विविध भागात आंदोलन केली जात आहेत. इंडिया आघाडीकडूनही मुख्य निवडणूक आयुक्त ज्ञानेश कुमार यांच्या विरोधात आक्रमक आंदोलन केली आहेत. इंडिया आघाडी लवकरच दिल्लीच्या रामलीला मैदानात आंदोलन करणार आहेत. या आंदोलनाच्या आधीपासूनच विरोधी पक्षाच्या नेत्यांकडून सहा महिन्यानंतर मोदी सरकार कोसळणार असल्याचा दावा केला जात आहे. आता संजय राऊतांनी देखील मोदी सरकार कोसळणार असल्याचा दावा केला. पंतप्रधान मोदींच्या जागी नवीन नेतृत्व येणार असल्याचाही दावा राऊतांनी केला.
राज्यात दुष्काळाच्या परिस्थितीवरून संजय राऊतांनी सरकारवर जोरदार हल्लाबोल केला. संजय राऊत म्हणाले, ‘आम्ही 72 चा दुष्काळ पाहिला आहे. इंदिरा पंतप्रधान होत्या. त्यापेक्षाही गंभीर परिस्थिती आहे. कोकणात कधी दुष्काळ जाहीर झाला नव्हता’. तर नव्या सरकारवर संजय राऊत पुढे म्हणाले, ‘ मोदींच्या जागी नाव सांगू शकतो, पण आता सांगणार नाही. रेझिम चेंज म्हणजे रेझिम चेंज’.
दुष्काळ परिस्थितीवरून फडणवीस सरकारवर हल्लाबोल करत म्हणाले की, ‘दुष्काळाचा सामना करण्यासाठी 50 हजार कोटींची गरज आहे. शेतकऱ्यांच्या तोंडावर 5 हजार रुपये फेकले. या राज्यकर्त्यांकडे निवडणूक लढण्यासाठी जो अतिरिक्त पैसा लागतो. तो प्रचंड आहे. तो भाजप असो शिंदे गट…सुनेत्रा पवार गट असो….बारामतीमधील सोमेश्वर सहकारी कारखान्याच्या निवडणुकीत जे पॅनल निवडून आलं. त्या निवडणुकीत त्या गटाने 30 कोटी खर्च केले. जर सोमेश्वर साखर कारखान्याच्या निवडणुकीत 25-30 कोटी खर्च होत आहेत. शिक्षक, पदवीधरच्या निवडणुकीत अर्धा तोळ्याचे दागिने, पैठणी, सफारी सूट दिला जात आहे. पैसे वाटले. तर राज्य गरीब आहे, असं कसं म्हणाल.
‘सरकारच्या तिजोरीत पैसा नाही. त्यांच्याकडे तिजोरीच्या लुटीतून आलेली प्रचंड संपत्ती आहे. सगळ्यात जास्त पैसे हे भाजप आणि शिंदे गटाकडे आहे. हा पैसा कुठून आला, कसा आला.. याबाबत राज्याचे मुख्यमंत्री खुलासा करू शकतात. तर राज्याचे अर्धे कर्ज कमी होईल. दुष्काळाच्या संदर्भात ज्या रक्कमेची गरज आहे. ती तुमच्या मंत्र्यांकडून मिळेल. त्यांचे खिसे झटकले तरी सुद्धा 1 लाख कोटी जमा होतील. तुमचे एक माजी आमदार नाचत होते. त्यांच्यावर पैसे उडवले जात होते. पन्नास खोके एकदम ओके…ही गर्जना ज्यांनी दिली. ते भाजपमध्ये गेले. ते डान्सबारमध्ये नाचतात, तसे नाचत होते. त्यांनी पाच पंचवीस उडवल्याचे दिसत आहे. तेव्हा राज्याच्या डोक्यावर कर्ज आहे, कसं मानायचं. हे राज्य सरकार मानत नाही. सत्ताधारी पक्षाच्या खासदार-आमदारांनी ठेकेदारांच्या माध्यमांतून राज्य लुटलं आहे,असे ते पुढे म्हणाले.
