बियर 80 रुपये, पेट्रोल 112 रुपये, घुमना है की झुमना है?; संजय राऊतांनी उडवली खिल्ली
Sanjay Raut on Government : आज शिर्डीत अहिल्यानगर जिल्ह्यातील कार्यकर्त्यांसाठी शिवसेना उद्धव बाळासाहेब ठाकरे पक्षाचा मेळावा आयोजित करण्यात आला होता. या मेळाव्यात संजय राऊत यांनी सरकारवर टीका केली आहे.
शिवसेना उद्धव बाळासाहेब ठाकरे पक्षाचा आज शिर्डीत मेळावा आयोजित करण्यात आलेला आहे. अहिल्यानगर जिल्ह्यातील कार्यकर्त्यांसाठी या मेळाव्याचे आयोजन करण्यात आलेले आहे. खासदार संजय राऊत, अंबादास दानवे, चंद्रकांत खैरे, सुनिल शिंदे यांच्यासह शिवसेनेचे अहिल्यानगर जिल्ह्यातील सर्व पदाधिकारी या मेळाव्याला उपस्थित आहेत. या मेळाव्यातील भाषणात खासदार संजय राऊत यांनी सरकारवर सडकून टीका केली आहे. राऊत यांनी नेमकं काय म्हटलं ते जाणून घेऊयात.
गाड्यांच्या ताफ्यावरून CM फडणवीसांना टोला
मध्य-पूर्वेतील तणावामुळे जागतिक इंधन पुरवठा साखळी विस्कळित झाली आहे. यामुळे जागतिक पातळीवर तेलाच्या किमतीत मोठी वाढ झाली आहे. परिणामी भारतातही इंधनाचे दर वाढले आहेत. यावर टीका करताना राऊत यांनी म्हटले की, ‘काही दिवसापूर्वी फडणवीस शिर्डीत आले वंदेभारत ट्रेनने, जाताना ताफा घेऊन गेले. इंधन बचतीसाठी पहिल्या दिवशी मोटरसायकलवर आले. 15 दिवसात आता 25 गाड्यांचा ताफा होता.’
पेट्रोल 112 रुपये आणि बियर 80 रुपये अशी स्थिती – राऊत
पुढे बोलताना राऊत म्हणाले की, मोदींच्या ताफ्यात तिसऱ्या दिवशी 48 गाड्या होत्या, मी मोजल्या. मला वाटलं फुटपाथवर उभं रहावं आणि मोदींना मेलोडी चॉकलेट द्यावं. इंधनाचे भाव वाढले, सत्ताधाऱ्यांनी दोन दिवस नाटक केलं. पेट्रोल 112 रुपये आणि बियर 80 रुपये अशी स्थिती आहे. घुमना है की झुमना है. मोदींनी मनकी बात करुन लोकांना सांगावं. गंदा है पर धंदा है. पंतप्रधान पाणी पिण्याबाबत मार्गदर्शन करतात. हे त्यांचे काम आहे का ?
देशात दोनच सेना, एक भारतीय सेना आणि दुसरी शिवसेना
शिवसेनेबाबत बोलताना राऊत म्हणाले की, या देशात दोनच सेना आहेत. एक सीमेवर भारतीय सेना आणि दुसरी महाराष्ट्रात शिवसेना. नरेंद्र मोदी दिल्लीत भेटतात, पण डोळ्यात डोळे घालण्याची हिंमत होत नाही. अमित शहा, तुम्ही शिवसेनेच्या पाठीत जो खंजीर खुपसला. एक दिवस तोच खंजीर तुमच्या पाठीत खुपसणार. शिवसैनिक बदला घेतल्याशिवाय राहणार नाही. आता मागे हटायचे नाही. आम्ही सर्व शिवसैनिकांच्या पाठीशी आहोत.
