Sharad Pawar Health Update : शरद पवारांना रुग्णालयातून डिस्चार्ज, प्रकृती कशी? डॉक्टरांचा मोठा सल्ला
राष्ट्रवादी काँग्रेसचे अध्यक्ष शरद पवार यांना पुण्याच्या रुबी हॉल क्लिनिकमधून डिस्चार्ज देण्यात आला आहे. गेल्या चार दिवसांपासून त्यांच्यावर उपचार सुरू होते, आता त्यांची प्रकृती स्थिर आहे.
राष्ट्रवादी काँग्रेसचे ज्येष्ठ नेते शरद पवार यांना डिस्चार्ज देण्यात आला आहे. गेल्या चार दिवसांपासून पुण्याच्या रुबी हॉल क्लिनिक (Ruby Hall Clinic) मध्ये शरद पवार उपचार घेत होते. आज डॉक्टरांनी शरद पवार यांना डिस्चार्ज दिला आहे. त्यांची प्रकृती आता पूर्णपणे स्थिर आहे, अशी माहिती शरद पवार यांचे अतिशय जवळचे मित्र आणि विश्वासू सहकारी विठ्ठल मणियार यांनी दिली. शरद पवार पुढील काही दिवस मुंबईतील आपल्या निवासस्थानी विश्रांती घेणार आहेत, असेही विठ्ठल मणियार यांनी सांगितले.
शरद पवार यांना प्रकृती अस्वास्थ्यामुळे चार दिवसांपूर्वी पुण्यातील प्रसिद्ध रुबी हॉल क्लिनिकमध्ये दाखल करण्यात आले होते. सलग चार दिवस तज्ज्ञ डॉक्टरांच्या देखरेखीखाली उपचार घेतल्यानंतर आज सकाळी त्यांना रुग्णालयातून डिस्चार्ज देण्यात आला. मिळालेल्या माहितीनुसार, थकवा आणि काही चाचण्यांच्या कारणास्तव पवारांना रुग्णालयात दाखल केले होते. या चार दिवसांत त्यांच्या काही महत्त्वाच्या वैद्यकीय चाचण्या करण्यात आल्या. आता या सर्व चाचण्यांचे रिपोर्ट समाधानकारक आले आहेत. तसेच त्यांची प्रकृती पूर्णपणे स्थिर असल्याने डॉक्टरांच्या पथकाने त्यांना घरी जाण्याची परवानगी दिली
शरद पवार यांचे अतिशय जवळचे मित्र आणि विश्वासू सहकारी विठ्ठल मणियार यांनी दिलेल्या माहितीनुसार, रुग्णालयातून डिस्चार्ज देताना डॉक्टरांनी शरद पवार यांना पुढील काही दिवस पूर्णपणे विश्रांती घेण्याचा सल्ला दिला आहे. सततचे दौरे आणि सभांमुळे त्यांच्या प्रकृतीवर ताण येत आहे, असे डॉक्टरांचे मत आहे. त्यामुळेच आता ते पुण्यातून थेट मुंबईच्या सिल्वर ओक या निवासस्थानी रवाना होणार आहेत.
भेटीगाठी मर्यादित राहण्याची शक्यता
साहेब जेव्हा कामात असतात, तेव्हाच त्यांना खरी विश्रांती मिळते. रिकामे बसणे त्यांच्या स्वभावात नाही. ते कामात असले की त्यांचे मनोबल वाढते आणि ते लवकर बरे होतात. असे असले तरी, प्रकृतीचे गांभीर्य लक्षात घेता पुढील काही दिवस त्यांच्या भेटीगाठी मर्यादित राहण्याची शक्यता आहे, अशी माहिती विठ्ठल मणियार यांनी दिली. यावेळी रुग्णालयातून बाहेर पडताना शरद पवार यांनी रुबी हॉल क्लिनिकमधील सर्व डॉक्टर, परिचारिका आणि कर्मचारी वर्गाचे मनापासून आभार मानले.
दरम्यान शरद पवारांना पुण्यातील रुग्णालयातून डिस्चार्ज मिळाल्यानंतर आता ते पुण्यातून मुंबईला जाणार आहेत. तिथे काही दिवस ते विश्रांती घेतील. त्यानंतर ते पुन्हा राजकारणात सक्रीय होतील, अशी माहिती मिळत आहे. शरद पवारांना डिस्चार्ज मिळाल्यानंतर राज्यभरातील कार्यकर्त्यांनी सोशल मीडियाच्या माध्यमातून त्यांना लवकर बरे होण्यासाठी शुभेच्छा दिल्या आहेत. तसेच डिस्चार्ज झाल्याचा आनंदही व्यक्त केला आहे.
